ഓൺലൈൻ റമ്മി പരസ്യങ്ങളിൽ അഭിനയിക്കുന്നതിൽ നിന്ന് സിനിമാ താരങ്ങളെ പിന്തിരിപ്പിക്കാൻ സർക്കാർ ഇടപെടണമെന്ന് കെ.ബി ഗണേഷ്കുമാർ എം.എൽ.എ പറഞ്ഞു. റിമി ടോമി, വിജയ് യേശുദാസ്, ലാൽ എന്നിവരാണ് ഇത്തരം പരസ്യങ്ങളിൽ അഭിനയിക്കുന്നത്.
നമ്മുടെ ആദരണീയരായ കലാകാരൻമാർ ഇത്തരം സാമൂഹ്യവിരുദ്ധമായ പരസ്യങ്ങളിൽ പങ്കെടുക്കുന്നത് ലജ്ജാകരമാണ്. ഇന്ത്യയിലെ ഏറ്റവും വലിയ അഭിനേതാക്കളിൽ ഒരാളാണ് ഷാരൂഖ് ഖാൻ. പണമില്ലാത്ത ഒരു മനുഷ്യനല്ല അദ്ദേഹം. വിരാട് കോഹ്ലി അഞ്ച് പൈസയില്ലാത്ത യാചകനല്ല. വിജയ് യേശുദാസും റിമി ടോമിയും ഇത്തരം പരസ്യങ്ങളിൽ സ്ഥിരമായി പ്രത്യക്ഷപ്പെടാറുണ്ട്. അത്തരം ലജ്ജാകരമായ പരസ്യങ്ങളിൽ നിന്നും ജനവിരുദ്ധവും രാജ്യദ്രോഹപരവുമായ പരസ്യങ്ങളിൽ നിന്നും മാന്യൻമാർ വിട്ടുനിൽക്കണം. അഭിനേതാക്കളുടെ സംഘടനയും ഇക്കാര്യം പരിഗണിക്കണമെന്ന് അദ്ദേഹം ആവശ്യപ്പെട്ടു.
ഓൺലൈൻ റമ്മി പരസ്യങ്ങളിൽ പ്രവർത്തിക്കുന്നവരെ നിയമത്തിന് കീഴിൽ നിയന്ത്രിക്കാൻ കഴിയില്ലെന്ന് മന്ത്രി വി.എൻ വാസവൻ മറുപടി പറഞ്ഞു. സാംസ്കാരിക വിപ്ലവം അഭിനേതാക്കളുടെ മനസ്സിൽ വരണം. അങ്ങനെ സംഭവിച്ചാൽ മാത്രമേ ഇതിന് മാറ്റമുണ്ടാകൂ. താരങ്ങളോട് ഇക്കാര്യം നമുക്കെല്ലാവരും ചേർന്ന് അഭ്യർത്ഥിക്കാമെന്നും മന്ത്രി കൂട്ടിച്ചേർത്തു.