തിരുവനന്തപുരം : സംസ്ഥാനങ്ങൾക്ക് നൽകുന്ന ജിഎസ്ടി നഷ്ടപരിഹാരം അഞ്ച് വർഷത്തേക്ക് കൂടി തുടരണമെന്ന് ആവശ്യപ്പെട്ട് മുഖ്യമന്ത്രി പിണറായി വിജയൻ പ്രധാനമന്ത്രിക്ക് കത്തയച്ചു. ജൂൺ അവസാനവാരം ചേർന്ന ജിഎസ്ടി കൗൺസിൽ യോഗത്തിലും സംസ്ഥാനങ്ങൾക്ക് ജിഎസ്ടി നഷ്ടപരിഹാരം തുടരണമെന്ന് കേരളവും മറ്റ് സംസ്ഥാനങ്ങളും കേന്ദ്രത്തോട് ആവശ്യപ്പെട്ടിരുന്നു. തികച്ചും ന്യായമായ ആവശ്യങ്ങളാണ് സംസ്ഥാനങ്ങൾ ഉന്നയിക്കുന്നതെന്നും മുഖ്യമന്ത്രി കത്തിൽ വ്യക്തമാക്കുന്നു.
സംസ്ഥാനങ്ങളുടെ സാമ്പത്തിക സ്ഥിതിയിൽ ഗണ്യമായ സ്വാധീനം ചെലുത്തുന്ന ഒരു വിഷയമാണിത്. 2017 ജൂലൈ ഒന്നിന് ജിഎസ്ടി നടപ്പാക്കിയതു മുതൽ സംസ്ഥാനങ്ങൾക്കുണ്ടായ വരുമാനനഷ്ടത്തിന് നഷ്ടപരിഹാരം നൽകാനാണ് കേന്ദ്രം അഞ്ച് വർഷത്തേക്ക് ജിഎസ്ടി നഷ്ടപരിഹാര തുക ഏർപ്പെടുത്തിയത്. ഈ ജിഎസ്ടി നഷ്ടപരിഹാര കാലയളവ് ജൂൺ മാസത്തിൽ അവസാനിച്ചു. 2017 ൽ ജിഎസ്ടി നടപ്പാക്കിയപ്പോൾ രാജ്യത്തെ നികുതി സമ്പ്രദായവും നടപടിക്രമങ്ങളും അഞ്ച് വർഷത്തിനുള്ളിൽ സ്ഥിരത കൈവരിക്കുമെന്ന് പ്രതീക്ഷിച്ചിരുന്നുവെന്നും എന്നാൽ അത് നടന്നില്ലെന്നും മുഖ്യമന്ത്രി കത്തിൽ ചൂണ്ടിക്കാട്ടി.
ജിഎസ്ടി നിരക്ക് 60:40 എന്ന അനുപാതത്തിൽ സംസ്ഥാനങ്ങളും കേന്ദ്രവും തമ്മിൽ പങ്കിടണമെന്ന് വിദഗ്ധ സമിതി ശുപാർശ ചെയ്തിട്ടുണ്ടെങ്കിലും നിലവിൽ ജിഎസ്ടി വരുമാനം തുല്യമായി വിഭജിക്കപ്പെട്ടിരിക്കുന്നു. ജിഎസ്ടിക്ക് ശേഷം സംസ്ഥാനങ്ങളുടെ അടിസ്ഥാന വാറ്റ് നിരക്ക് 14.5 ശതമാനത്തിൽ നിന്ന് 9 ശതമാനമായി കുറഞ്ഞു. സംസ്ഥാനങ്ങൾക്ക് ഉണ്ടായ ഈ നികുതി നഷ്ടങ്ങൾക്കുള്ള നഷ്ടപരിഹാരമായാണ് ജിഎസ്ടി നഷ്ടപരിഹാരമായി വിഭാവനം ചെയ്തതെന്നും മുഖ്യമന്ത്രി കത്തിൽ പറയുന്നു.