ന്യൂഡല്‍ഹി: രാജ്യം ഇത്തവണ കടന്നു പോയത് ഒന്നേകാല്‍ നൂറ്റാണ്ടിലെ ഏറ്റവും ചൂടുകൂടിയ ദിനങ്ങളിലൂടെ. 122 വര്‍ഷത്തിനിടയിലെ ഏറ്റവും ചൂട് കൂടിയ മാര്‍ച്ച് മാസമായിരുന്നു ഇത്തവണയെന്ന കേന്ദ്ര കാലാവസ്ഥാ നിരീക്ഷണ കേന്ദ്രം വ്യക്തമാക്കുന്നു. വടക്കുപടിഞ്ഞാറന്‍ ഇന്ത്യയിലെ ഏറ്റവും ചൂടേറിയ മാസവും മധ്യ ഇന്ത്യയിലെ രണ്ടാമത്തെ ഏറ്റവും ചൂടേറിയ മാസവുമായിരുന്നു കടന്ന് പോയത്.
1901 മുതലുള്ള കണക്കുകള്‍ പരിശോധിച്ചാല്‍ 2010 ആയിരുന്നു നേരത്തെ ഇത്തരത്തില്‍ ഉയര്‍ന്ന താപ നില രേഖപ്പെടുത്തിയ വര്‍ഷം. 2010 ല്‍ മാര്‍ച്ച് മാസത്തില്‍ അനുഭവപ്പെട്ട പരമാവധി താപനില എന്ന റെക്കോര്‍ഡ് ഇത്തവണ മറികടന്നു എന്നും കാലവാസ്ഥ വകുപ്പിന്റെ കണക്കുകള്‍ വ്യക്തമാക്കുന്നു. 2010 മാര്‍ച്ചില്‍ ഇന്ത്യയില്‍ രേഖപ്പെടുത്തിയ ഉയര്‍ന്ന പകല്‍ താപനില ശരാശരി 33.09 ഡിഗ്രി സെല്‍ഷ്യസ് ആയിരുന്നു. എന്നാല്‍ ഇത്തവണ മാര്‍ച്ചില്‍ ഇത് 33.1 ഡിഗ്രി സെല്‍ഷ്യസ് ആയിരുന്നു എന്നും കാലവസ്ഥാ വകുപ്പ് ചൂണ്ടിക്കാട്ടുന്നു.