കഴിഞ്ഞ ദിവസം നറുക്കെടുത്ത സംസ്ഥാന സർക്കാരിന്റെ ക്രിസ്തുമസ്- പുതുവത്സര ബമ്പർ ഭാഗ്യവാനെ തിരഞ്ഞ് കേരളം. ഒന്നാം സമ്മാനമായ 12 കോടി XG 358753 എന്ന ടിക്കറ്റിനാണ് ലഭിച്ചത്. കൊല്ലം ആര്യങ്കാവിലെ ഭരണി ലക്കി ഏജൻസിയാണു ടിക്കറ്റ് വിറ്റത്. പാറശാല എൻ‍എംകെ ഏജൻസി ഉടമ മുഹമ്മദ് യാസിന്റെ സബ് ഏജൻസിയാണിത്.
ഭാഗ്യശാലി ആരാണെന്ന് ഇതുവരെ കണ്ടെത്താനായില്ല. ആരാണ് ടിക്കറ്റ് വാങ്ങിയതെന്ന് ഓർമ്മയില്ലെന്നും അന്വേഷിച്ചു കൊണ്ടിരിക്കയാണെന്നും ഭരണി ഏജൻസി ഉടമ വെങ്കിടേശൻ പറയുന്നു. ശബരിമല തീർഥാടകരും ആര്യങ്കാവ് ശ്രീധർമ ശാസ്താ ക്ഷേത്രത്തിൽ എത്തിയവരും ഉൾപ്പടെ ഉള്ളവർ ഇവിടെനിന്നു ടിക്കറ്റ് എടുത്തിരുന്നു. 2010ലെ സമ്മർ ബമ്പറിന്റെ 2 കോടി രൂപ അടിച്ചതും വെങ്കിടേശൻ വിറ്റ ടിക്കറ്റിനായിരുന്നു.