ഷാർജ (www.mediavisionnews.in) :ഷാർജയിൽ കഴിഞ്ഞരാത്രിയിൽ വീണ്ടും തീപിടിത്തം. അഞ്ചു പേർക്കോളം പരുക്കേറ്റു. ജമാൽ അബ്ദുൽ നാസർ സ്ട്രീറ്റിൽ ലൂത്താ ബിൽഡിങിന്റെ രണ്ടാം നിലയിൽ (ഫസ്റ്റ് ഫ്ലോർ) ഫ്ലാറ്റ് നമ്പർ 101 ലാണ് തീപിടിത്തമുണ്ടായത്. രാത്രി പന്ത്രണ്ടോടെ എക്സ്റ്റൻഷൻ കേബിളിന് തീപിടിച്ച് വീട്ടുപകരണങ്ങളിലേക്കും ഫ്ലാറ്റിലേക്കും പടരുകയായിരുന്നു എന്നറിയുന്നു.
തീ കണ്ട് ഭയന്നു താഴേക്ക് ഓടിയിറങ്ങാൻ ശ്രമിച്ചവർക്കും എടുത്തു ചാടിയവർക്കുമാണ് പരുക്കേറ്റത്. ഒന്നാം നില മുഴുവൻ തീയും പുകയും നിറഞ്ഞിരുന്നതിനാൽ പലരും മുകളിലേക്ക് തിരികെ ഓടി ഏറ്റവും മുകളിലുള്ള14-ാം നിലയിലെ ടെറസിൽ എത്തി. ഒന്നാം നിലയിൽ നിന്ന് താഴേക്ക് ചാടിയ ഒരാളുടെ തുടയെല്ലാണ് ഒടിഞ്ഞത്.
ഒരാളുടെ മുകളിലേക്ക് മറ്റൊരാൾ വീണതിനെ തുടർന്നും പരുക്കേറ്റു. തലടിച്ചു വീണ ഒരാൾക്കും പരുക്കേറ്റു. സ്റ്റെയറിലെ ഗ്ലാസ് കൈകൊണ്ട് തകർക്കാൻ ശ്രമിച്ച രണ്ടുപേരിൽ ഒരാളുടെ കൈ മുറിയുകയും മറ്റെ ആളുടെ കൈ ഒടിയുകയും ചെയ്തിട്ടുണ്ട്. പരുക്കേറ്റവരെ രാത്രിയിൽത്തന്നെ അൽഖാസിമിയ ആശുപത്രിയിലാക്കി. ആരുടെയും നില ഗുരുതരമല്ലെന്ന് അറിയുന്നു. രാത്രി തന്നെ ഫയർ ഡിഫൻസ് എത്തി തീ അണച്ചു.