കൊല്‍ക്കത്ത: കൊവിഡ് ലോക്ഡൗണ്‍ ലംഘനങ്ങള്‍ നിരീക്ഷിക്കാന്‍ കേന്ദ്ര സംഘത്തെ അയച്ചതില്‍ പ്രധാനമന്ത്രി നരേന്ദ്രമോദിയും ആഭ്യന്തര മന്ത്രി അമിത് ഷായും വിശദീകരണം നല്‍കണമെന്ന് പശ്ചിമബംഗാള്‍ മുഖ്യമന്ത്രി മമതാ ബാനര്‍ജി. മന്ത്രാലയവുമായി ബന്ധപ്പെട്ട രണ്ട് സംഘങ്ങളാണ് ബംഗാളിലെ ഏഴ് ജില്ലകളില്‍ സന്ദര്‍ശനം നടത്തുന്നത്. തലസ്ഥാന നഗരമായ കൊല്‍ക്കത്തയിലും സംഘം സന്ദര്‍ശനം നടത്തി റിപ്പോര്‍ട്ട് സമര്‍പ്പിക്കും.
ആഭ്യന്തര മന്ത്രാലയമാണ് ഇത് സംബന്ധിച്ച ഉത്തരവിറക്കിയത്. ഇതിന് തൊട്ടുപിന്നാലെയാണ് വിശദീകരണം ആവശ്യപ്പെട്ട് മമതാ ബാനര്‍ജി രംഗത്തെത്തിയിരിക്കുന്നത്. എന്തിന് ഇങ്ങനെയൊരു തീരുമാനമെടുത്തു എന്നതിനെക്കുറിച്ച് പ്രധാനമന്ത്രിയും ആഭ്യന്തരമന്ത്രിയും വ്യക്തമാക്കണം. തന്റെ സംസ്ഥാനം ഈ നീക്കത്തോട് സഹകരിക്കില്ലെന്നും മമത ട്വീറ്റ് ചെയ്തു.
‘എല്ലാത്തരത്തിലുള്ള കൊവിഡ് പ്രതിരോധ പ്രവര്‍ത്തനങ്ങളെയും സ്വാഗതം ചെയ്യുന്നു. പക്ഷേ, ഇന്ത്യയിലെ ചില ജില്ലകളില്‍ പോയി ലോക്ഡൗണ്‍ റിപ്പോര്‍ട്ടുകള്‍ തയ്യാറാക്കാന്‍ കേന്ദ്രസംഘത്തെ നിയോഗിച്ചിരിക്കുകയാണ്. ബംഗാളിലെ ചില ജില്ലകളും ഇതില്‍ പെടും. ഇത് എന്തിന്റെ അടിസ്ഥാനത്തിലാണെന്ന് മനസിലാകുന്നില്ല’, മമത പറഞ്ഞു.
‘ഇതിന് ഉപയോഗിച്ച മാനദണ്ഡം എന്താണെന്ന് വ്യക്തമാക്കാന്‍ ഞാന്‍ പ്രധാനമന്ത്രി നരേന്ദ്ര മോദിയോടും ആഭ്യന്തര മന്ത്രി അമിത് ഷായോടും ആവശ്യപ്പെടുകയാണ്. അത് ലഭിക്കുന്നതുവരെ വ്യക്തമായ കാരണമില്ലാതെ ഇതുമായി മുന്നോട്ടുപോകാന്‍ ഞങ്ങള്‍ക്ക് ഭയമുണ്ട്. ഇത് ഫെഡറലിസവുമായി പൊരുത്തപ്പെട്ട് പോകില്ല’, മമത വ്യക്തമാക്കി.
കേന്ദ്ര ഉത്തരവിനെക്കുറിച്ച് സംസ്ഥാനസര്‍ക്കാരിനെ അറിയിച്ച് 15 മിനുട്ടിനുള്ളില്‍ ഇരു സംഘവും ബംഗാളിലെത്തയെന്ന് ചീഫ് സെക്രട്ടറി രാജീവ് സിന്‍ഹ വാര്‍ത്താ സമ്മേളനത്തില്‍ അറിയിച്ചു. മമതാ ബാനര്‍ജി വാര്‍ത്താ സമ്മേളനത്തില്‍ പങ്കെടുത്തിരുന്നില്ല.
‘നമ്മളെന്തൊ മറച്ചുവെക്കുന്നത് പോലെയാണ് കേന്ദ്രസംഘം പെരുമാറുന്നത്. അവരെ സംസ്ഥാനത്തുടനീളം യാത്രചെയ്യാന്‍ അനുവദിക്കില്ല. ബി.എസ്.എഫിനൊപ്പമാണ് അവരിറങ്ങിയത്. ഈ രീതി അംഗീകരിക്കാനാവില്ല’, സിന്‍ഹ പറഞ്ഞു.