ഉപ്പള: (www.mediavisionnews.in) കാറില്‍ കടത്തുകയായിരുന്ന 5 കിലോ കഞ്ചാവ് തട്ടിയെടുക്കാനെത്തിയ സംഘത്തിന്റെ കാര്‍ നിയന്ത്രണം വിട്ട് ചെളിമണ്ണില്‍ താഴ്ന്നു.
കഴിഞ്ഞ ദിവസം രാത്രി 10.30 മണിയോടെ മഞ്ചേശ്വരം പൊലീസ് സ്റ്റേഷന്‍ പരിധിയിലാണ് സംഭവം. ഉപ്പള ഭാഗത്തേക്ക് വിതരണം ചെയ്യാന്‍ വേണ്ടി കാറില്‍ കൊണ്ടുവരികയായിരുന്ന അഞ്ച് കിലോ കഞ്ചാവ് തട്ടിയെടുക്കാന്‍ വേണ്ടി ഉപ്പളയിലെ ഒരു ഗുണ്ടാസംഘം നടത്തിയ ശ്രമമാണ് പാളിയത്. മംഗളൂരു-കാസര്‍കോട് ദേശീയപാതയില്‍ കഞ്ചാവുമായി വരികയായിരുന്ന കാറിന് കുറുകെ നിര്‍ത്തി കഞ്ചാവ് തട്ടിയെടുക്കാനുള്ള ശ്രമത്തിനിടെ ഗുണ്ടാസംഘത്തിന്റെ കാര്‍ ചെളിമണ്ണില്‍ താഴുകയായിരുന്നു. അതിനിടെ കഞ്ചാവുമായെത്തിയ കാര്‍ ഇടുങ്ങിയ റോഡിലൂടെ ഓടിച്ചുപോവുകയായിരുന്നുവത്രെ. ചെളിമണ്ണില്‍ കുടുങ്ങിയ കാറിനെ നാട്ടുകാര്‍ മാറ്റാന്‍ ശ്രമിക്കുന്നതിനിടെ അകത്തുണ്ടായിരുന്ന സംഘം ഓടി രക്ഷപ്പെട്ടു. വിവരം അറിഞ്ഞെത്തിയ മഞ്ചേശ്വരം പൊലീസ് അപകടത്തില്‍പ്പെട്ട കാര്‍ കസ്റ്റഡിയില്‍ എടുത്ത് സ്റ്റേഷനിലേക്ക് മാറ്റി. മൂന്ന് പേരാണ് സംഭവത്തിന് പിന്നിലെന്നാണ് നാട്ടുകാര്‍ പറയുന്നത്. സംഘത്തെ കുറിച്ച് വിശദമായി അന്വേഷിക്കുന്നതായി മഞ്ചേശ്വരം പൊലീസ് പറഞ്ഞു. കഞ്ചാവുമായി രക്ഷപ്പെട്ട കാറിനെയും പ്രതിയെയും തിരിച്ചറിഞ്ഞതായും പ്രതിക്ക് വേണ്ടി അന്വേഷണം ഊര്‍ജിതമാക്കിയതായും പൊലീസ് പറഞ്ഞു.
മീഡിയവിഷൻ ന്യൂസിൽ വാർത്തകൾക്കും പരസ്യങ്ങൾക്കും 9895046567 എന്ന നമ്പറിൽ ബന്ധപ്പെടുക