കർണാടകയിൽ കോൺഗ്രസിന്റെ തിരഞ്ഞെടുപ്പ് വാഗ്ദാനങ്ങൾ പാലിക്കുന്നതിന്റെ ഭാഗമായുള്ള ക്ഷേമപദ്ധതികൾക്ക് തുടക്കമായി. സർക്കാർ ബസുകളിൽ സ്ത്രീകൾക്ക് സൗജന്യയാത്ര വാഗ്ദാനം ചെയ്യുന്ന ശക്തി പദ്ധതിയാണ് മുഖ്യമന്ത്രി സിദ്ധരാമയ്യ കണ്ടക്ടറായി സർക്കാർ ബസിൽ യാത്ര ചെയ്ത് ഉദ്ഘാടനം നിർവഹിച്ചത്.
അൽപ നേരത്തേക്കെങ്കിലും മുഖ്യമന്ത്രി ബസ് കണ്ടക്ടറായി. മെജസ്റ്റിക്ക് ബസ് സ്റ്റാൻഡിൽ നിന്ന് നിയമ സഭാ മന്ദിരമായ വിധാന സൗധയിലേക്കുള്ള ബി.എം. ടി. സി. ബസിലാണ് മുഖ്യൻ കണ്ടക്ടർ വേഷത്തിലെത്തിയത്. വനിതാ യാത്രക്കാർക്ക് സൗജന്യയായി ടിക്കറ്റ് നൽകി ശക്തി പദ്ധതിക്ക് തുടക്കമിട്ടു. ഇതോടെ കർണാടകയിൽ ലക്ഷ്വറി, എ.സി ഒഴികെയുള്ള എല്ലാ സർക്കാർ ബസുകളിലും എ.പി.എൽ.ബി.പി. എൽ വ്യത്യാസമില്ലാതെ സ്ത്രീകൾക്ക് യാത്ര സൗജന്യമായി. മന്ത്രിമാരും എം.എൽ എമാരും വിവിധ മണ്ഡലങ്ങളിലും ജില്ലകളിലും ഇതേ സമയം പദ്ധതിയുടെ പ്രാദേശിക തല ഉദ്ഘാടനവും നിർവഹിച്ചു.
ശക്തിക്ക് പുറമെ ബി.പി.എൽ കുടുംബങ്ങൾളിലെ ഓരോ അംഗങ്ങൾക്കും മാസം10 കില അരി നൽകുന്ന അന്ന ഭാഗ്യ, വീടുകൾക്ക് 200 യുണിറ്റ് വൈദ്യുതി സൗജന്യമാക്കുന്ന ഗൃഹജ്യോതി, ഗൃഹനാഥകളായ സ്ത്രീകൾക്ക് പെൻഷൻ നൽകുന്ന ഗൃഹ ലക്ഷ്മി, അഭ്യസ്ഥ വിദ്യരായ യുവതീ യുവാക്കൾക്ക് പഠനം കഴിഞ്ഞിറങ്ങിയ ആദ്യ രണ്ടു വർഷം ഹോണറേറിയം നൽകുന്ന യുവ നിധി, എന്നിവയാണ് കോൺഗ്രസ് തിരഞ്ഞെടുപ്പ് സമയത്തു നൽകിയ വാഗ്ദാനങ്ങൾ. ഇവ എല്ലാം നടപ്പാക്കാൻ കഴിഞ്ഞ മന്ത്രിസഭ ഉത്തരവിറക്കിയിരുന്നു. അടുത്ത മാസം മുതൽ ഈ പദ്ധതികളും നിലവിൽ വരും. ലോക്സഭാ തിരഞ്ഞെടുപ്പ് ലക്ഷ്യം വച്ചു വമ്പിച്ച ആഘോഷത്തോടെയാണ് ഓരോ പദ്ധതികളും നടപ്പിലാക്കുന്നതു.