ഓഫ് റോഡ് വാഹനങ്ങളിലെ പുത്തൻ താരോദയമായ മാരുതി സുസുക്കി ജിംനിയുടെ വില പ്രഖ്യാപിച്ചു. പ്രത്യേകിച്ചം ഓഫ്റോഡ് പ്രേമികൾ ഏറെ പ്രതീക്ഷയോടെ കാത്തിരിക്കുന്നതിനിടെയാണ് ജിംനിയുടെ വിലവിവരങ്ങൾ പ്രഖ്യാപിച്ചത്. 12.74 ലക്ഷം രൂപയാണ് വാഹനത്തിന്റെ പ്രാരംഭവില. രണ്ടു വേരിയന്റുകളിലായാണ് ജിംനിയെ വിപണിയിലെത്തിച്ചിരിക്കുന്നത്.
ബെയ്സ് മോഡലായ Zeta മാനുവലിന്‌ 12.74 ലക്ഷവും Zeta ഓട്ടോ മാറ്റിക്കിന് 13.94 ലക്ഷവുമാണ് എക്‌സ്‌ഷോറൂം വില. വില. രണ്ടാമത്തെ മോഡലായ Alpha MT ക്ക് 13.69 ലക്ഷവും Alpha AT യ്ക്ക് 14.89 ലക്ഷവുമാണ് വില. ആൽഫ ഓട്ടമാറ്റിക്ക് ഡ്യുവൽ ടോണിന് 15.05 ലക്ഷം രൂപയാണ് വില.
ഈ വർഷം ആദ്യം നടന്ന ഓട്ടോ എക്‌സ്‌പോയിൽ അവതരിപ്പിച്ച വാഹനത്തിന്റെ ബുക്കിങ്ങ് മുപ്പതിനായിരത്തോളം കടന്നിരുന്നു. ഇന്ത്യയിലാണ് ജിംനിയുടെ ഫൈവ് ഡോർ മോഡൽ ആദ്യമായി എത്തുന്നത്. ഒരു മാസം 7000 യൂണിറ്റ് ജിംനികളാണ് ഇന്ത്യൻ വിപണിക്ക് നൽകുക. ഒരു വർഷം ഒരു ലക്ഷം യൂണിറ്റ് ജിംനികൾ നിർമ്മിക്കാനാണ് കമ്പനി ലക്ഷ്യമിടുന്നത്.
ഓഫ് റോഡ് പ്രേമികൾക്ക് പ്രിയങ്കരമായി രീതിയില്‍ നിർമ്മിച്ചിരിക്കുന്നതിനാല്‍ കുറച്ച് പൊക്കം തോന്നും. ആറു എയർ ബാഗുകളാണ് യാത്രക്കാരുടെ സുരക്ഷയ്ക്കായി ഒരുക്കിയിരിക്കുന്നത്. നിറങ്ങളുടെ കാര്യത്തിൽ ജിംനി അതിന്റെ ആകർഷകമായ ഓപ്ഷനുകൾ മുന്നോട്ടുവെക്കുന്നു. ഡീലർഷിപ്പുകൾ അനുസരിച്ച്, എസ്‌യുവിയുടെ ഏറ്റവും ജനപ്രിയമായ കളർ ചോയ്‌സുകളായി ബ്ലൂഷ് ബ്ലാക്ക്, കൈനറ്റിക് യെല്ലോ, പേൾ ആർട്ടിക് വൈറ്റ് എന്നിവയുണ്ട്.
ഓട്ടോ എൽഇഡി ഹെഡ്‌ലാമ്പുകൾ, 9 ഇഞ്ച് ടച്ച്‌സ്‌ക്രീൻ, സ്മാർട്ട്‌പ്ലേ പ്രോ+ ഇൻഫോടെയ്ൻമെന്റ് സിസ്റ്റം, ക്രൂയിസ് കൺട്രോൾ, ആർക്കാമിസ് സൗണ്ട് സിസ്റ്റം എന്നിവയുൾപ്പെടെ ആകർഷകമായ സവിശേഷതകളാണ് ജിംനി ആൽഫ ട്രിമ്മിൽ ഉള്ളത്. ആറ് എയർബാഗുകൾ സജ്ജീകരിച്ചിരിക്കുന്ന ആൽഫ ട്രിം, ഹിൽ-ഹോൾഡ് അസിസ്റ്റുള്ള ESP, ഹിൽ-ഡിസന്റ് കൺട്രോൾ, ഒരു റിയർ-വ്യൂ ക്യാമറ, EBD ഉള്ള എബിഎസ് എന്നിവ ഉൾപ്പടെ സുരക്ഷയ്ക്കും മുൻഗണനയുണ്ട്.