ദോഹ: ഖത്തറിൽ ബഹുനില കെട്ടിടം ഭാഗികമായി തകർന്നു. ദോഹ അൽ മൻസൂറയിൽ ആൾതാമസമുള്ള ഏഴ് നില കെട്ടിടമാണ് ബുധനാഴ്ച രാവിലെ തകർന്നു വീണത്. ഖത്തർ സിവിൽ ഡിഫൻസ്, ആംബുലൻസ്, പൊലീസ് ഉൾപ്പെടെ രക്ഷാ പ്രവർത്തനം തുടരുന്നു.
ബുധനാഴ്ച രാവിലെ 8.18ഓടെയാണ് മൻസൂറ ബി റിങ്ങ് റോഡിൽ ലുലു എക്സ്പ്രസിന് പിറകിലുള്ള ബഹുനില കെട്ടിടം തകർന്നത്. സമീപത്തെ മൂന്നു നില കെട്ടിടത്തിന് മുകളിലേക്കായിരുന്നു തകർന്നു വീണത്.
പരിക്കോ, ആളപായമോ ഉണ്ടായത് സംബന്ധിച്ച് റിപ്പോർട്ടുകൾ ലഭ്യമായിട്ടില്ല. പാകിസ്താൻ, ഈജിപ്ത്, ഫിലിപ്പിനോ കുടുംബങ്ങൾ താമസിക്കുന്ന കെട്ടിടമാണെന്നാണ് സൂചന. അപകടം സംബന്ധിച്ച് ഔദ്യോഗിക പ്രസ്താവനകൾ പുറത്തു വിട്ടിട്ടില്ല.