ശാസ്ത്രിക്ക് 9.5 കോടി, ദ്രാവിഡിന് 12 കോടി; എത്രയാകും ഗംഭീറിന്റെ പ്രതിഫലം?

ഇന്ത്യന്‍ പരിശീലകനായിരിക്കെ കരാര്‍ അടിസ്ഥാനത്തില്‍ 12 കോടി രൂപയാണ് വാര്‍ഷിക പ്രതിഫലമായി ദ്രാവിഡിന് ബിസിസിഐ നല്‍കിയിരുന്നത്. 2021 ടി20 ലോകകപ്പിനു പിന്നാലെയാണ് ദ്രാവിഡ് ടീമിന്റെ ചുമതല ഏറ്റെടുക്കുന്നത്. ഗംഭീറിന് ഇതിലും ഉയര്‍ന്ന തുക ലഭിക്കുമെന്ന് തന്നെയാണ് റിപ്പോര്‍ട്ടുകള്‍.

2017-ല്‍ ഇന്ത്യന്‍ ടീമിന്റെ മുഖ്യ പരിശീലകനായിരുന്ന രവി ശാസ്ത്രിയുടെ വാര്‍ഷിക പ്രതിഫലം 9.5 കോടി രൂപയായിരുന്നു. പിന്നീട് ദ്രാവിഡിലേക്കെത്തിയപ്പോള്‍ രണ്ടരക്കോടിയുടെ വര്‍ധനവാണ് ബോര്‍ഡ് പരിശീലകന്റെ പ്രതിഫലക്കാര്യത്തില്‍ വരുത്തിയത്. ശാസ്ത്രിക്ക് മുമ്പ് ടീമിന്റെ പരിശീലകനായിരുന്ന അനില്‍ കുംബ്ലെയ്ക്ക് ലഭിച്ച വാര്‍ഷിക പ്രതിഫലം 6.5 – 8 കോടിക്കും ഇടയിലായിരുന്നു. അതിനാല്‍ തന്നെ ഗംഭീറിന് 12.5 കോടിക്കും 15 കോടിക്കും ഇടയിലാകും പ്രതിഫലം ലഭിക്കുകയെന്നാണ് റിപ്പോര്‍ട്ടുകള്‍.