ന്യൂഡൽഹി: പുതുതായി തിരഞ്ഞെടുക്കപ്പെട്ട 543 ലോക്‌സഭാംഗങ്ങളിൽ 251 പേർക്കെതിരിൽ ക്രിമിനൽ കേസുകൾ ഉണ്ടെന്നും അവരിൽ 27 പേർ കുറ്റക്കാരാണെന്നും തെരഞ്ഞെടുപ്പ് അവകാശ സംഘടനയായ അസോസിയേഷൻ ഓഫ് ഡെമോക്രാറ്റിക് റിഫോംസ്( എ.ഡി.ആർ) പുറത്തുവിട്ടു. മൊത്തം അംഗങ്ങളുടെ 46 ശതമാനം വരും ഇവർ.
അംഗങ്ങളിൽ 170 പേർ (31 ശതമാനം) ബലാത്സംഗം, കൊലപാതകം, കൊലപാതകശ്രമം, തട്ടിക്കൊണ്ടുപോകൽ, സ്ത്രീകൾക്കെതിരായ കുറ്റകൃത്യങ്ങൾ എന്നിവ ഉൾപ്പെടെയുള്ള ഗുരുതരമായ കേസുകൾ നേരിടുന്നു. പാർലമെന്റിന്റെ അധോസഭയിലെത്തുന്ന ക്രിമിനൽ കേസിൽ ഉൾപ്പെട്ടവരിൽ ഏറ്റവും കൂടുതൽ എണ്ണമാണിത്തവണത്തേത്.
2014ൽ 185, 2009ൽ 162, 2004ൽ 125 എം.പിമാർ എന്നിങ്ങനെയായിരുന്നു കണക്ക്. ഗുരുതരമായ ക്രിമിനൽ കേസുകൾ പ്രഖ്യാപിച്ച എം.പിമാരുടെ എണ്ണത്തിൽ 2009 മുതൽ 124 ശതമാനം വർധനവുണ്ടായി.