ഈ വർഷം ജനപ്രിയ വാഹന ബ്രാൻഡായ മാരുതിയില്‍ നിന്നുള്ള ആദ്യത്തെ പ്രധാന ഉൽപ്പന്ന ലോഞ്ചാണ് മാരുതി സുസുക്കി ഫ്രോങ്ക്സ് കോംപാക്റ്റ് ക്രോസ്ഓവർ . 7.47 ലക്ഷം മുതൽ 13.14 ലക്ഷം രൂപ വരെ (എല്ലാം എക്‌സ്‌ഷോറൂം) വിലയുള്ള അഞ്ച് വകഭേദങ്ങളിൽ (സിഗ്മ, ഡെൽറ്റ, ഡെൽറ്റ+, സീറ്റ, ആൽഫ) ഫ്രോങ്ക്സ് വരുന്നു. ഇപ്പോൾ, കാർ നിർമ്മാതാവ് അതിന്റെ രണ്ടാമത്തെ വലിയ മോഡലായ അഞ്ച് ഡോർ ജിംനി ലൈഫ്‌സ്‌റ്റൈൽ എസ്‌യുവി അവതരിപ്പിക്കാൻ ഒരുങ്ങുകയാണ്. ഇതിന്റെ ഔദ്യോഗിക ലോഞ്ച് തീയതി ഇതുവരെ വെളിപ്പെടുത്തിയിട്ടില്ലെങ്കിലും, മോഡൽ 2023 മെയ് അവസാനത്തോടെ വിൽപ്പനയ്‌ക്ക് എത്തുമെന്നാണ് റിപ്പോർട്ടുകള്‍.
ഇപ്പോഴിതാ പുതിയ ജിംനിയുടെ വില വിവരങ്ങള്‍ ചോര്‍ന്നിരിക്കുന്നു. പ്രധാന എതിരാളിയായ മഹീന്ദ്ര ഥാറിനേക്കാൾ വളരെ വില കുറഞ്ഞതായിരിക്കും ജിംനി എന്നാണ് പുറത്തുവരുന്ന റിപ്പോര്‍ട്ടുകള്‍. രണ്ട് വാഹനങ്ങളുടെയും ടോപ്പ് എൻഡ് വേരിയന്റുകൾ തമ്മിലുള്ള വ്യത്യാസം ഏകദേശം നാല് ലക്ഷം രൂപയായിരിക്കും എന്ന് കാര്‍ ടോഖ് റിപ്പോര്‍ട്ട് ചെയ്യുന്നു. ബേസ് വേരിയന്റിന് ഏകദേശം 9.99 ലക്ഷം രൂപയും എക്‌സ് ഷോറൂം വിലയിൽ ടോപ്പ് എൻഡിന് 13.99 ലക്ഷം രൂപയുമാണ് ജിംനിയുടെ പ്രതീക്ഷിക്കുന്ന വില. മഹീന്ദ്ര ഥാര്‍ 4X4 ന്റെ അടിസ്ഥാന വേരിയന്റിന് 13.87 ലക്ഷം രൂപയാണ് വില. അതായത് രണ്ട് വാഹനങ്ങളുടെയും അടിസ്ഥാന വേരിയന്‍റിന്‍റെ എക്‌സ്‌ഷോറൂം വിലയിൽ ഏകദേശം 4.5 ലക്ഷം രൂപയുടെ വ്യത്യാസമുണ്ട്. 10.54 ലക്ഷം രൂപയിൽ ആരംഭിക്കുന്ന 1.5 ലിറ്റർ ഡീസൽ എഞ്ചിനോടുകൂടിയ ഥാറിന്റെ RWD വേരിയന്റ് മഹീന്ദ്ര അടുത്തിടെ അവതരിപ്പിച്ചിരുന്നു.
മഹീന്ദ്ര ഥാർ 4×4 എം‌എൽ‌ഡി ടോപ്പ് എൻഡ് വേരിയന്റ് 16.77 ലക്ഷം രൂപയ്ക്ക് വിൽക്കുന്നു. ദില്ലിയിൽ, മഹീന്ദ്ര ഥാര്‍ 4X4 LX ഹാർഡ്-ടോപ്പ് ഡീസൽ-ഓട്ടോമാറ്റിക്കിന് 19.6 ലക്ഷം രൂപയാണ് ഓണ്‍ റോഡ് വില. ജിംനിക്ക് 15.5 ലക്ഷം മുതൽ 16 ലക്ഷം രൂപ വരെ വിലവരും. രണ്ട് വാഹനങ്ങളുടെയും ടോപ് എൻഡ് വേരിയന്റുകൾ തമ്മിൽ ഏകദേശം നാല് ലക്ഷത്തിന്റെ വ്യത്യാസമുണ്ടാകും.
എന്നാൽ മാരുതി സുസുക്കി ജിംനി ഒരു പെട്രോൾ എഞ്ചിൻ ഓപ്ഷൻ മാത്രമേ നൽകൂ. അതേസമയം, താർ ഡീസൽ എഞ്ചിൻ ഓപ്ഷനും വാഗ്ദാനം ചെയ്യുന്നു. ഥാറിന്റെ ടോപ്പ് എൻഡ് വേരിയന്റിൽ ഓട്ടോമാറ്റിക് ട്രാൻസ്മിഷനുമായാണ് വരുന്നത്. കൂടാതെ, താറിന്റെ ഓട്ടോമാറ്റിക് ട്രാൻസ്മിഷൻ 6-സ്പീഡ് യൂണിറ്റാണ്, ജിംനി 4-സ്പീഡ് യൂണിറ്റാണ് ഉപയോഗിക്കുന്നത്. ഈ മാറ്റങ്ങൾ കൂടാതെ ജിംനിയും ഥാറും തമ്മിൽ വലിപ്പ വ്യത്യാസമുണ്ട്. ജിംനിയേക്കാൾ 175 എംഎം വീതിയും 135 എംഎം ഉയരവും താറിന് ഉണ്ട്. ഉയർന്ന ഗ്രൗണ്ട് ക്ലിയറൻസും ഥാറിന് ലഭിക്കുന്നു.
അതേസമയം ലോഞ്ചിന് മുന്നോടിയായി ജിംനി ഡീലര്‍ഷിപ്പുകളില്‍ എത്തിത്തുടങ്ങിയെന്നും റിപ്പോര്‍ട്ടുകള്‍ ഉണ്ട്. ഡീലർഷിപ്പിൽ എത്തിയ വെള്ള നിറത്തിലുള്ള ജിംനി അഞ്ച് ഡോറിന്‍റെ ചിത്രങ്ങള്‍ വൈറലാകുന്നുണ്ട്. ഈ മുഴുവൻ വെള്ള നിറത്തിലുള്ള ജിംനിക്ക് സിംഗിൾ-ടോൺ നിറമാണ് ലഭിക്കുന്നത്. കറുപ്പ്, ചുവപ്പ്, വെളുപ്പ്, ഗ്രേ, ബ്ലൂ എന്നീ ഏഴ് ഷേഡുകളിലും ചുവപ്പ്, സിഗ്നേച്ചർ ഷേഡ് യെല്ലോ എന്നീ ഇരട്ട-ടോൺ ഷേഡുകളിലും ജിംനി ലഭ്യമാകുമെന്ന് മാരുതി സുസുക്കി ഇതിനകം പ്രഖ്യാപിച്ചിട്ടുണ്ട്.
ബ്ലൂഷ് ബ്ലാക്ക്, നെക്‌സ ബ്ലൂ, ഗ്രാനൈറ്റ് ഗ്രേ, സിസ്ലിംഗ് റെഡ്, പേൾ ആർട്ടിക് വൈറ്റ്, ബ്ലൂഷ് ബ്ലാക്ക് റൂഫുള്ള സിസ്ലിംഗ് റെഡ്, ബ്ലൂഷ് ബ്ലാക്ക് റൂഫുള്ള കൈനറ്റിക് യെല്ലോ എന്നിവ ഉൾപ്പെടെ ഏഴ് എക്സ്റ്റീരിയർ കളർ ഓപ്‌ഷനുകൾ വാങ്ങുന്നവർക്ക് ലഭിക്കും. അതിന്റെ ഡ്യുവൽ-ടോൺ കൈനറ്റിക് യെല്ലോ വിത്ത് ബ്ലൂയിഷ് ബ്ലാക്ക് റൂഫ് മോഡൽ പലതവണ കണ്ടിട്ടുണ്ടെങ്കിലും, അടുത്തിടെ ഡീലർഷിപ്പുകളിൽ പേൾ ആർട്ടിക് വൈറ്റിലും സിസ്ലിംഗ് റെഡ് വിത്ത് ബ്ലഷ് ബ്ലാക്ക് റൂഫ് പെയിന്റ് സ്‍കീമുകളിലും ഉള്ള ജിംനികള്‍ എത്തിയിട്ടുണ്ട് എന്നാണ് റിപ്പോര്‍ട്ടുകള്‍.
മാരുതി സുസുക്കിയുടെ അഞ്ച് ഡോർ ലൈഫ്‌സ്‌റ്റൈൽ എസ്‌യുവിയിൽ 105 ബിഎച്ച്‌പി കരുത്തും 134 എൻഎം ടോർക്കും സൃഷ്‍ടിക്കുന്ന 1.5 എൽ കെ15 ബി പെട്രോൾ എഞ്ചിനാണ് ഉപയോഗിക്കുന്നത്. മോട്ടോറിന് മൈൽഡ് ഹൈബ്രിഡ് സാങ്കേതികവിദ്യയുണ്ട് കൂടാതെ രണ്ട് ഗിയർബോക്സ് ഓപ്ഷനുകളുണ്ട്. അഞ്ച് -സ്പീഡ് മാനുവൽ, നാല് സ്പീഡ് ടോർക്ക് കൺവെർട്ടർ ഓട്ടോമാറ്റിക്ക് എന്നിവ. മാരുതി ജിംനി മോഡൽ ലൈനപ്പിന് സീറ്റ, ആൽഫ എന്നീ രണ്ട് വകഭേദങ്ങൾ മാത്രമേ ലഭിക്കൂ.
9.0 ഇഞ്ച് ടച്ച്‌സ്‌ക്രീൻ സ്‍മാര്‍ട്ട് പ്ലേ പ്രോ പ്ലസ് ഇൻഫോടെയ്ൻമെന്റ് സിസ്റ്റം, ആര്‍ക്കമിസ് സൗണ്ട് സിസ്റ്റം, ക്ലൈമറ്റ് കൺട്രോൾ, കീലെസ് സ്റ്റാർട്ട്, ക്രൂയിസ് കൺട്രോൾ, ഫോഗ് ലാമ്പുകൾ, എല്‍ഇഡി ഹെഡ്‌ലാമ്പുകൾ, ഹെഡ്‌ലാമ്പ് വാഷറുകൾ, ഓട്ടോ ഹെഡ്‌ലാമ്പുകൾ, ബോഡി-നിറമുള്ള ഡോർ ഹാൻഡിലുകൾ, അലോയ് വീലുകൾ തുടങ്ങി എല്ലാ ഫീച്ചറുകളും ആൽഫ ട്രിമ്മിൽ ലഭ്യമാണ്. സ്റ്റാൻഡേർഡ് ഫീച്ചർ കിറ്റിൽ 7.0 ഇഞ്ച് ഇൻഫോടെയ്ൻമെന്റ് യൂണിറ്റ്, വയർലെസ് ആപ്പിൾ കാർപ്ലേ, ആൻഡ്രോയിഡ് ഓട്ടോ കണക്റ്റിവിറ്റി, കളർ എംഐഡി ഡിസ്പ്ലേ, പവർ വിൻഡോകൾ, റിവേഴ്‌സിംഗ് ക്യാമറ, ബ്രേക്ക് ലിമിറ്റഡ് സ്ലിപ്പ് ഡിഫറൻഷ്യൽ, സീറ്റ് ബെൽറ്റ് പ്രെറ്റെൻഷനറുകൾ, ഐസോഫിക്സ് ചൈൽഡ് സീറ്റ് ആങ്കറേജുകൾ, ഇലക്ട്രോണിക് സ്റ്റെബിലിറ്റി പ്രോഗ്രാം, ആറ് എയർബാഗുകൾ, നാല് സ്പീക്കർ ഓഡിയോ സിസ്റ്റം, ഇലക്ട്രിക്കലി ക്രമീകരിക്കാവുന്ന വിംഗ് മിററുകൾ, സ്റ്റീൽ വീലുകൾ തുടങ്ങിയവയും ലഭിക്കും.