കാസർകോട് : സംസ്ഥാന പ്രസിഡന്റ്‌ കെ സുരേന്ദ്രനെതിരെ പ്രതിഷേധം കടുപ്പിച്ച് കാസർകോട്ടെ ബിജെപി പ്രവർത്തകർ. സുരേന്ദ്രനെയും സംസ്ഥാന സെക്രട്ടറി കെ ശ്രീകാന്തിനെയും പുറത്താക്കണമെന്നാവശ്യപ്പെട്ട്‌ ബിജെപി കേന്ദ്രങ്ങളിൽ ഫ്ലക്സ് ബോർഡുകളുയർന്നു. ഉദയഗിരി, പാറക്കട്ട, ജെ പി കോളനി, കറന്തക്കാട് പ്രദേശങ്ങളിലാണ് ബിജെപി പ്രവർത്തകൻ ജ്യോതിഷിന്റെ ചരമവാർഷികദിനത്തിൽ ബോർഡ്‌ സ്ഥാപിച്ചത്‌.
ബലിദാനികളെ അപമാനിച്ചവരെ സംരക്ഷിക്കുന്ന സുരേന്ദ്രനെയും ശ്രീകാന്തിനെയും പാർടിയിൽനിന്ന് പുറത്താക്കണമെന്നാണ്‌ ആവശ്യം. കെ ശ്രീകാന്ത്, ബിജെപി മുൻ ജില്ലാ പ്രസിഡന്റ്‌ കെ സുരേഷ്‌കുമാർ ഷെട്ടി, മഞ്ചേശ്വരം മണ്ഡലം മുൻ ജനറൽ സെക്രട്ടറി കെ മണികണ്ഠ റൈ എന്നിവർക്കെതിരെ നടപടിയാവശ്യപ്പെട്ട് പ്രവർത്തകർ രണ്ടുതവണ ജില്ലാ കമ്മിറ്റി ഓഫീസ് ഉപരോധിച്ച് താഴിട്ടുപൂട്ടിയിരുന്നു. ജില്ലാ വൈസ് പ്രസിഡന്റ്‌ പി രമേശൻ ഉൾപ്പെടെ നിരവധി നേതാക്കൾ പദവികൾ രാജിവച്ചു.