ഓഫീസിന് പകരം കാര്യാലയം; കമ്യൂണിസ്റ്റ് വാക്കുകള്‍ ഇനി BJP മിണ്ടില്ല, മുഷ്ടിചുരുട്ടിയ ചിത്രവും വേണ്ട

സമ്മേളനങ്ങളുടെയും കാമ്പെയിനുകളുടെയും പോസ്റ്ററുകളില്‍ മുഷ്ടിചുരുട്ടിയ മനുഷ്യരുടെ ചിത്രങ്ങള്‍ വേണ്ടെന്നും നിര്‍ദേശിച്ചിട്ടുണ്ട്. പൊതുപരിപാടികളുടെ വേദികള്‍ കമ്യൂണിസ്റ്റ് പാര്‍ട്ടികളുടെ സമ്മേളനവേദികളുമായി സാമ്യമുള്ള രീതിയില്‍ അലങ്കരിക്കരുതെന്നും പറഞ്ഞിട്ടുണ്ട്. കേരളത്തിലെ വോട്ടര്‍മാരെ കമ്യൂണിസ്റ്റ് അനുഭാവികളും കമ്യൂണിസ്റ്റ് വിരുദ്ധരും എന്ന രീതിയിലാണ് ദേശീയ നേതൃത്വം തരംതിരിക്കുന്നത്. കമ്യൂണിസ്റ്റ് വിരുദ്ധ വോട്ടുകള്‍ പരമാവധി സ്വന്തം പെട്ടിയിലേക്ക് മാറ്റുകയാണ് തന്ത്രം.

കമ്യൂണിസ്റ്റ് പ്രയോഗങ്ങളും ശരീരഭാഷയും പ്രസംഗശൈലിയുമെല്ലാം ഇതിന് തടസ്സമാകുമെന്ന തത്ത്വമാണ് ബി.ജെ.പി. ദേശീയ നേതൃത്വത്തിനുള്ളത്. കമ്യൂണിസ്റ്റുകളോട് കടുത്ത മത്സരമുള്ളയിടങ്ങളില്‍ അവരെ അനുകരിക്കാനുള്ള പ്രവണത ബി.ജെ.പി.ക്കാര്‍ കാണിക്കുന്നതായും അവര്‍ വിലയിരുത്തുന്നു.