ലോകകപ്പ് ജയിച്ച ആഘോഷം; ഏഷ്യാ കപ്പ് കിരീടവുമായി എത്തിയ ശ്രീലങ്കന്‍ ടീമിന് നാട്ടില്‍ ഗംഭീര വരവേല്‍പ്പ്

കൊളംബോ: പാകിസ്താനെ തോൽപിച്ച് ഏഷ്യാകപ്പുമായി നാട്ടിലെത്തിയ ശ്രീലങ്കൻ ടീമിന് ലഭിച്ചത് അത്യുജ്വല സ്വീകരണം. മാസങ്ങൾക്ക് മുമ്പ് വരെ ശ്രീലങ്കൻ സർക്കാരിനെതിരെ രോഷം പ്രകടിപ്പിക്കാനാണ് ആളുകൾ കൂടിയിരുന്നതെങ്കിൽ ഇന്നലെയും ഇന്നുമത് ആനന്ദത്തിനായിരുന്നു. വിമാനത്താവളത്തിലെത്തിയ സംഘത്തെ ബഹുമതികളോടെയാണ് വരവേറ്റത്.

തുടർന്ന് എയർപോർട്ടിൽ സ്വീകരണമൊരുക്കി. തുറന്ന ഡബിൾ ഡക്കർ ബസിൽ കപ്പുമുയർത്തി ലങ്കൻ സംഘം ചുറ്റിക്കറങ്ങി. വഴിയിലുടനീളം തടിച്ചുകൂടിത് നിരവധിയാളുകൾ. കൂടിനിൽക്കുന്നവരിലേക്ക് നായകൻ ദസുൻ ശനക ആവേശപൂർവം കപ്പ് നീട്ടി. പലരും മൊബൈൽ ക്യാമറയിൽ ചിത്രം പകർത്തുന്നുണ്ടായിരുന്നു. ശ്രീലങ്കയുടെ ഔദ്യോഗിക സമൂഹമാധ്യമ പേജുകളിൽ ഇതിന്റെ ചിത്രങ്ങൾ പങ്കുവെക്കുകയും ചെയ്തു. നിമിഷ നേരം കൊണ്ടാണ് ചിത്രങ്ങള്‍ വൈറലായത്.

ശ്രീലങ്കയിൽ നടത്താനിരുന്ന ടൂര്‍ണമെന്റാണ് യുഎയിലേക്ക് മാറ്റിയത്. അതിരൂക്ഷമായ അഭ്യന്തര പ്രശ്‌നങ്ങളിൽ വലഞ്ഞ രാജ്യത്ത് പ്രധാനപ്പൊട്ടൊരു ടൂർണമെന്റ് നടത്തുന്നിലെ ആശങ്ക പരിഗണിച്ചാണ് വേദി മാറ്റിയത്. ഈയൊരു സങ്കടം ലങ്കൻ ജനതയിലുണ്ട്. ഒരു പക്ഷേ ടൂർണമെന്റ് നടന്നിരുന്നെങ്കിൽ കുറച്ച് സഞ്ചാരികൾ എത്തിയേനെ, അതു വഴി വരുമാനവും. ഏതായാലും കപ്പ് തന്നെ നേടിക്കൊടുത്ത് നാട്ടുകാർക്ക് ആശ്വാസമാകുകയാണ് ദസുൻ ശനകയുടെ ടീം. ഈ ടീമിൽ നിന്ന് മഹേളയും സംഗക്കാരയും മുത്തയ്യ മുരളീധരനും ജയസൂര്യയേയുമൊക്കെ അവർ സ്വപ്‌നം കാണുന്നുണ്ട്.