അട്ടപ്പാടി: അട്ടപ്പാടിയിലെ വിദൂര ഗ്രാമമായ മുരുഗള ഊര് വ്യാഴാഴ്ച കളക്ടറും പട്ടികവർഗ വകുപ്പ് ഡെപ്യൂട്ടി ഡയറക്ടറും സന്ദർശിക്കും. മന്ത്രി കെ. രാധാകൃഷ്ണന്‍റെ നിർദ്ദേശ പ്രകാരമാണ് അടിയന്തര സന്ദർശനം. റിസർവ് വനമേഖലയിലുള്ള ഇവിടെയെത്തണമെങ്കിൽ റോഡിൽ നിന്ന് ഒന്നര കിലോമീറ്ററിലധികം നടക്കണം. കഴിഞ്ഞ ദിവസം മരിച്ച ഗ്രാമത്തിലെ ഒരു പിഞ്ചുകുഞ്ഞിന്‍റെ മൃതദേഹവുമായി പിതാവ് നടന്നുപോയതായി റിപ്പോർട്ടുകളുണ്ടായിരുന്നു. ഈ സാഹചര്യത്തിലാണ് കളക്ടർ മുൺമൃയി ജോഷിയും ഡെപ്യൂട്ടി ഡയറക്ടർ കെ കൃഷ്ണ പ്രകാശും ഊര് സന്ദർശിക്കുന്നത്.
മുക്കാലിയിൽ നിന്ന് 8 കിലോമീറ്റർ അകലെ തടിക്കുണ്ട് വരെ റോഡുണ്ട്. മുരുഗളയിലെത്താൻ ഭവാനിപ്പുഴയ്ക്ക് കുറുകെ പട്ടികവർഗ വകുപ്പ് നിർമ്മിച്ച തൂക്കുപാലം കടക്കണം. മുരുഗള ഊരിലേക്ക് ഗതാഗത സൗകര്യം ഒരുക്കുന്നതുമായി ബന്ധപ്പെട്ട റിപ്പോർട്ടും മന്ത്രി കെ രാധാകൃഷ്ണൻ ആവശ്യപ്പെട്ടു. അയ്യപ്പന്‍റെയും സരസ്വതിയുടെയും നാലുമാസം പ്രായമായ കുഞ്ഞ് സജിനേശ്വരിയാണ് മരിച്ചത്.
കുട്ടിയുടെ മൃതദേഹം ഗ്രാമത്തിലേക്ക് കൊണ്ടുപോകാൻ ആംബുലൻസ് സൗകര്യമില്ലാത്തതിനാൽ പിതാവ് മൃതദേഹവുമായി നടക്കുകയായിരുന്നു. പിതാവിന്‍റെ നിസ്സഹായതയും ഗ്രാമത്തിന്‍റെ ദുരവസ്ഥയും ഈ സംഭവം തെളിയിക്കുന്നു. ഗ്രാമത്തിലെത്താൻ മറ്റൊരു വഴിയുമില്ല. ഗോത്ര ഊരിന്റെ അടിവാരം വരെ മാത്രമേ വണ്ടി എത്തുകയുള്ളൂ. അരുവിയും മുറിച്ചു കടക്കണം. അസുഖം പിടിപെട്ടാലും ആശുപത്രിയിലേക്ക് കൊണ്ടുപോകാൻ കഴിയാത്ത അവസ്ഥയാണ് ഗ്രാമത്തിലുള്ളത്.