സ്വർണ്ണക്കടത്ത് കേസിൽ സി.ബി.ഐ അന്വേഷണം ആവശ്യപ്പെട്ട് പ്രതിപക്ഷ നേതാവ് നിയമസഭയിൽ നൽകിയ സബ്മിഷന് സ്പീക്കർ അനുമതി നിഷേധിച്ചു. മന്ത്രി പി രാജീവ് ഉന്നയിച്ച ക്രമസമാധാന പ്രശ്നത്തെ അംഗീകരിച്ചായിരുന്നു സ്പീക്കറുടെ നടപടി. സർക്കാരും മുഖ്യമന്ത്രിയും ചോദ്യങ്ങളിൽ നിന്ന് ഒളിച്ചോടുകയാണെന്ന് പ്രതിപക്ഷ നേതാവ് വി.ഡി സതീശൻ ആരോപിച്ചു.
സ്വർണക്കടത്ത് കേസിൽ സിബിഐ അന്വേഷണം ആവശ്യപ്പെട്ട് പ്രതിപക്ഷ നേതാവ് വി ഡി സതീശൻ സബ്മിഷൻ നോട്ടീസ് നൽകി. സബ്മിഷൻ ലിസ്റ്റിലെ ആദ്യ ഇനമായി ഈ വിഷയം ഉൾപ്പെടുത്തിയിരുന്നു. എന്നാൽ ക്രമസമാധാന പ്രശ്നം ഉന്നയിച്ച് നിയമമന്ത്രി പി രാജീവ് രംഗത്തെത്തി. സ്വർണക്കടത്തുമായി സംസ്ഥാന സർക്കാരിന് യാതൊരു ബന്ധവുമില്ലെന്നും സബ്മിഷൻ ചട്ടങ്ങൾക്ക് എതിരാണെന്നും പി രാജീവ് ചൂണ്ടിക്കാട്ടി.
സംസ്ഥാന സർക്കാരിന്റെ അധികാരപരിധിയിൽ വരുന്ന വിഷയമാണ് താൻ ഉന്നയിച്ചതെന്നും വി ഡി സതീശൻ പറഞ്ഞു. എന്നാൽ പി രാജീവ് ഉന്നയിച്ച ക്രമസമാധാന പ്രശ്നം നിലനിൽക്കുമെന്ന നിലപാടും സ്പീക്കർ സ്വീകരിച്ചു. സമർപ്പിക്കാനുള്ള അനുമതിയും നിഷേധിച്ചു.