പാക്കിസ്ഥാന്‍ റിപ്പബ്ലിക് ദിനത്തില്‍ ആശംസയറിയിച്ച് വാട്‌സ്ആപ്പ് സ്റ്റാറ്റസ്; കര്‍ണാടകയില്‍ യുവതി അറസ്റ്റില്‍
പാക്കിസ്ഥാന്റെ റിപ്പബ്ലിക് ദിനത്തില്‍ ആശംസകള്‍ നേര്‍ന്നുകൊണ്ടുള്ള വാട്‌സ് ആപ്പ് സ്റ്റാറ്റസ് പങ്കുവെച്ചതിനെ തുടര്‍ന്ന് കര്‍ണാടകയില്‍ 25കാരി അറസ്റ്റില്‍. കുത്മ ഷെയ്ഖ് എന്ന യുവതിയെയാണ് പൊലീസ് അറസ്റ്റ് ചെയ്തത്.
ഇവര്‍ക്ക് എതിരെ ഒരാള്‍ പരാതി നല്‍കിയതിനെ തുടര്‍ന്ന് ശനിയാഴ്ചയാണ് ബാഗല്‍കോട്ട് ജില്ലാ പൊലീസ് അറസ്റ്റ് ചെയ്തത്. ഐ.പി.സി 153(എ), 505(2) എന്നീ വകുപ്പുകളാണ് യുവതിക്ക് എതിരെ ചുമത്തിയിരിക്കുന്നത്. മാര്‍ച്ച് 23നായിരുന്നു കേസിന് ആസ്പദമായ സംഭവം.
പാക്കിസ്ഥാന്‍ റിപ്പബ്ലിക് ദിനത്തില്‍ ആളുകള്‍ക്ക് ആശംസയറിയിച്ച് കുത്മ ഷെയ്ഖ് വാട്‌സ് ആപ്പില്‍ സ്റ്റാറ്റസ് ഇട്ടിരുന്നു. അല്ലാഹു എല്ലാ രാജ്യങ്ങളിലും ഐക്യവും സമാധാനവും നല്‍കട്ടെ എന്നായിരുന്നു സ്റ്റാറ്റസ്. ഇതോടൊപ്പം, പാക്കിസ്ഥാന്റെ റിപ്പബ്ലിക് ദിനത്തില്‍ ആശംസകള്‍ അറിയിച്ച് ഒരു ഫോട്ടോയും ഉണ്ടായിരുന്നതായി ന്യൂ ഇന്ത്യന്‍ എക്സ്പ്രസ് റിപ്പോര്‍ട്ട് ചെയ്തു.