പേരാമംഗലം: വീട് വൃത്തിയാക്കിയ മാലിന്യം കവറിലാക്കി പഞ്ചായത്തിന്റെ മാലിന്യ ബിന്നിലേക്ക് വലിച്ചെറിഞ്ഞ കൂട്ടത്തില്‍ നഷ്ടപ്പെട്ടത് മൂന്നര പവന്റെ താലിമാലയും. പുറനാട്ടുകര സ്വദേശി വിജി രാജേഷിന്റെ മാലയാണ് കാണാതായത്. വീട് മുഴുവന്‍ അരിച്ചുപെറുക്കിയെങ്കിലും മാല കിട്ടിയില്ല.
ശേഷം, കഴിഞ്ഞ ദിവസം വീട് വൃത്തിയാക്കിയ മാലിന്യം കവറിലാക്കി മാലിന്യ ബിന്നില്‍ വലിച്ചെറിഞ്ഞത് ഓര്‍മ്മ വന്നു. ഉടന്‍ തന്നെ, പുറനാട്ടുകര 12-ാം വാര്‍ഡിലെ മാലിന്യ പ്ലാന്റിലെത്തി മാലിന്യം വേര്‍തിരിക്കുന്ന തൊഴിലാളികളോട് വിവരം പറഞ്ഞു. എന്നാല്‍, മാലിന്യ ബിന്നില്‍നിന്ന് കൊണ്ടുവരുന്ന മാലിന്യ ഉറകള്‍ തൊഴിലാളികള്‍ വേര്‍തിരിച്ച് സംസ്‌കരിക്കുന്ന ആദ്യപടിയില്‍ മാല കണ്ടെത്താന്‍ കഴിഞ്ഞിരുന്നില്ല.
പിന്നീട് ദിവസങ്ങള്‍ക്കു ശേഷം മാലിന്യം വേര്‍തിരിക്കുന്ന തൊഴിലാളികള്‍ ഏറെ തിരഞ്ഞപ്പോഴാണ് മാല കിട്ടിയത്. സ്വര്‍ണമാല ഉടമസ്ഥയായ വിജി രാജേഷിന് വാര്‍ഡംഗം എ.ബി. ബിജീഷിന്റെ സാന്നിദ്ധ്യത്തില്‍ തൊഴിലാളികളെത്തി തിരിച്ചു നല്‍കുകയും ചെയ്തു. കളഞ്ഞുപോയി എന്ന് കരുതിയ താലിമാല തിരികെ ലഭിച്ചതിന്റെ സന്തോഷത്തിലാണ് വിജി.