എരുമപ്പെട്ടി: കോവിഡ് പ്രോട്ടോകോൾ പാലിച്ച് പള്ളികളിൽ ജുമുഅ നമസ്കാരത്തിന് അനുവാദം നൽകാത്തതിൽ പ്രതിഷേധിച്ച് പന്നിത്തടത്ത് 40 പേരെ പങ്കെടുപ്പിച്ച് വെള്ളിയാഴ്ച റോഡിൽ ളുഹ്ർ നമസ്കാരം നടത്തി. എസ്.പി. ഉമ്മർ മുസ്‌ലിയാർ, എം.എസ്. ബഷീർ, തൗഫീഖ് എന്നിവരുടെ നേതൃത്വത്തിലാണ് റോഡിൽ നമസ്കാരം നിർവഹിച്ചത്.
സർക്കാറിന് വരുമാനം ലഭിക്കുന്ന സ്ഥലങ്ങളിൽ ജനക്കൂട്ടം രൂക്ഷമാണെങ്കിലും ഇവിടെ ഒരു നിയന്ത്രണവുമില്ലാതെയാണ് പ്രവർത്തിക്കുന്നതെന്നും ഇത്തരം സ്ഥാപനങ്ങൾക്ക് സർക്കാർ അനുമതി നൽകിയിട്ടും പള്ളികളും മറ്റു ആരാധനാലയങ്ങളും തുറന്നു പ്രവർത്തിക്കാൻ അനുവാദം നൽകാത്തത് ഏറെ ഖേദകരമാണെന്നും നമസ്കാരത്തിന് നേതൃത്വം നൽകിയ എസ്.പി. ഉമ്മർ മുസ്‌ലിയാർ പറഞ്ഞു.
