മലയാളത്തില്‍ ഇതുവരെയിറങ്ങിയ ഏറ്റവും മികച്ച ക്യാമ്പസ് ചിത്രമാണ് ക്ലാസ്‌മേറ്റ്‌സ്. 2006ല്‍ പുറത്തിറങ്ങിയ ചിത്രത്തില്‍ പൃഥ്വിരാജ്, ഇന്ദ്രജിത്ത്, കാവ്യമാധവന്‍, നരേന്‍, ജയസൂര്യ തുടങ്ങി ഒരുപിടി താരങ്ങളാണ് അണിനിരന്നത്. അതില്‍ മറക്കാത്ത കഥാപാത്രമായിരുന്നു നടി രാധിക അവതരിപ്പിച്ച റസിയ.
റസിയ എന്ന കഥാപാത്രത്തെ ഒരിക്കല്‍ക്കൂടി ഫോട്ടോഷൂട്ടിലൂടെ പുനരവതരിപ്പിച്ചിരിക്കുകയാണ് രാധിക. കറുത്ത പര്‍ദയണിഞ്ഞു പുസ്തകവും കൈയിലേന്തി നില്‍ക്കുന്ന രാധികയുടെ ചിത്രങ്ങള്‍ സാമൂഹിക മാധ്യമങ്ങളില്‍ വൈറലായിക്കഴിഞ്ഞു. ജയപ്രകാശ് പയ്യന്നൂര്‍ ആണ് ഫോട്ടോഗ്രാഫര്‍.
ഒന്നര ദശാബ്ദം കഴിഞ്ഞെങ്കിലും രാധികയ്ക്ക് ഒരു മാറ്റവും വന്നിട്ടില്ലെന്നാണ് ആരാധകര്‍ പറയുന്നത്. ക്ലാസ്‌മേറ്റ്‌സ് ആണോ എന്നാണ് ചിലര്‍ ചോദിച്ചത്.
ക്ലാസ്‌മേറ്റ്‌സ് രണ്ടു പോലെയുണ്ട് എന്ന് ചിലര്‍ പ്രതികരിച്ചു. കുറച്ചു പ്രായമായെന്നു പറഞ്ഞവരുമുണ്ട്. എന്റെ ഖല്‍ബിലെ വെണ്ണിലാവു നീ എന്ന് കമന്റ് ചെയ്തവരും ഏറെ.
