രാജ്യത്തെ ജുവലറി വ്യവസായത്തെ മുഴുവന്‍ കള്ളപ്പണം വെളുപ്പിക്കല്‍ നിരോധന നിയമത്തിന്റെ പരിധിയിലാക്കി കേന്ദ്രസർക്കാർ ഉത്തരവിറക്കിയത് സ്വർണക്കടക്കാരെയും ഉപയോക്താക്കളെയും ആശങ്കലിയാക്കിയിട്ടുണ്ട്. 2020 ഡിസംബര്‍ 28 മുതല്‍ പിഎംഎല്‍എ നിയമത്തിന്റെ പരിധിയിലാണ് ജുവലറി ഇടപാടുകള്‍ എന്ന് ചൂണ്ടിക്കാട്ടിയാണ് ധനമന്ത്രാലയം ഉത്തരവിറക്കിയത്. സ്വര്‍ണമോ, സ്വര്‍ണ ഇടപാടുമായി ബന്ധപ്പെട്ട പണമോ കൃത്യമായ രേഖകള്‍ ഇല്ലാതെ പിടിക്കപ്പെട്ടാല്‍ അവിടെ വിശദമായ അന്വേഷണം നടത്താന്‍ എന്‍ഫോഴ്‌സ്‌മെന്റ് ഡയറക്ടറേറ്റിന് അധികാരമുണ്ടാവും.
എന്താണ് പുതിയ ഉത്തരവ്? – ഉപഭോക്താവുമായി 10 ലക്ഷം രൂപയ്‌ക്കോ, അതിന് മുകളിലോ ഒന്നോ അതില്‍ അധികമോ തവണകളായി ജുവലറി ഇടപാട് നടത്തിയാല്‍ രേഖകള്‍ സൂക്ഷിക്കണം എന്നത് നിര്‍ബന്ധമാണ്. ഇഡി ആവശ്യപ്പെട്ടാല്‍ ഈ രേഖകള്‍ ഹാജരാക്കണം. ഇതിലൂടെ എല്ലാ ഇടപാടുകളുടേയും രേഖകള്‍ സൂക്ഷിക്കാന്‍ ജുവലറി ഉടമകള്‍ ബാധ്യസ്ഥരാവും. കൃത്യമായ രേഖകള്‍ ഹാജരാക്കിയില്ലെങ്കില്‍ സ്വത്ത് കണ്ടുകെട്ടലിന് പുറമെ മൂന്ന് മുതല്‍ ഏഴ് വര്‍ഷം വരെ തടവ് ശിക്ഷ ലഭിക്കാം. കൃത്യമായ രേഖകള്‍ ഇല്ലാതെ പണമോ, സ്വര്‍ണമോ അധികൃതര്‍ പിടിച്ചെടുത്താല്‍ മൂല്യത്തിന്റെ 82.50 ശതമാനം സര്‍ക്കാരിലേക്ക് കണ്ടുകെട്ടുകയാണ് ഇപ്പോഴത്തെ നില. പുതിയ നിയമത്തോടെ കണ്ടുകെട്ടലിന് പുറമെ അന്വേഷണവും നേരിടണം.
സ്വർണക്കടകൾക്ക് സർക്കുലർ- ധനമന്ത്രാലയത്തിന്റെ ഉത്തരവിന്റെ അടിസ്ഥാനത്തിൽ എൻഫോഴ്സ്മെന്റ് സ്വർണക്കടകൾക്ക് സർക്കുലർ അയച്ചുതുടങ്ങി. ഉപയോക്താവ് ഒന്നോ അതിലധികോ തവണകളിലായി 10 ലക്ഷം രൂപയുടെ സ്വർണം, വെള്ളി, ഡയമണ്ട്, മറ്റ് വിലകൂടിയ രത്നങ്ങൾ എന്നിവ വാങ്ങിയാൽ അതിന്റെ ഇടപാട് രേഖകൾ സൂക്ഷിക്കണമെന്നും ഇതു സംബന്ധിച്ച വിവരങ്ങൾ കൃത്യമായി എൻഫോഴ്സ്മെന്റ് ഡയറക്ടറേറ്റിനെ അറിയിക്കണമെന്നും സർക്കുലറിൽ വ്യക്തമാക്കുന്നു.
ആഭരണങ്ങൾ വാങ്ങുമ്പോൾ പണം നൽകുന്നവരുടെ പേരുവിവരങ്ങൾ രേഖപ്പെടുത്തണം. പുതിയ സർക്കുലർ പ്രകാരം രേഖകളില്ലാത്ത സ്വർണമോ പണമോ പിടിച്ചെടുത്താൽ അതു സർക്കാരിലേക്ക് കണ്ടുകെട്ടും. ജുവലറി ഉടമയ്ക്കും ജീവനക്കാർക്കും മൂന്നുമുതൽ ഏഴുവർഷം വരെ തടവുശിക്ഷയുമുണ്ട്. രണ്ട് ലക്ഷത്തിന് മുകളിലുള്ള (പണം നൽകിയുള്ള) ആഭരണ വിൽപനകൾക്ക് കെവൈസി നിർബന്ധം. രണ്ടുലക്ഷം രൂപയുടെ വരെ ആഭരണം പല തവണകളായി വാങ്ങിയാൽ ജുവലറികൾ ഉപയോക്താക്കളുടെ രേഖകൾ സൂക്ഷിക്കേണ്ടതില്ല.
ജുവലറികളുടെ ആശങ്ക- പരമ്പരാഗതമായി നിയമാനുസൃതം പ്രവർത്തിക്കുന്ന സ്വർണവ്യാപാരികളെ കള്ളപ്പണക്കാരായി ചിത്രീകരിക്കുന്നതാണ് ഇഡിയുടെ സർക്കുലർ എന്നാണ് ജുവലറി ഉടമകൾ പറയുന്നത്. ഉപയോക്താക്കളുടെ വിവരം ഇഡിക്ക് കൈമാറണമെന്ന വ്യവസ്ഥ ദൂരവ്യാപക പ്രത്യാഘാതമുണ്ടാക്കുമെന്ന് ജുവലറി ഉടമകളുടെ സംഘടനകൾ പറയുന്നു. നിലവിൽ ആദായ നികുതി വകുപ്പിന് സ്വർണ വ്യാപാര മേഖലയിലെ എല്ലാ കണക്കുകളും ലഭ്യമാണ്. എട്ട് വർഷത്തെ കണക്കുകൾ സൂക്ഷിക്കുകയും ചെയ്യുന്നുണ്ട്. വകുപ്പ് ആവശ്യപ്പെടുന്ന പ്രത്യേക സാമ്പത്തിക ഇടപാടുകളുടെ രേഖകൾ കൈമാറുന്നുമുണ്ട്.
10,000 രൂപയിൽ കൂടുതലുള്ള ഇടപാടുകൾ ചെക്ക്, ഇ-പേയ്മെന്റ് വഴിയാണ് കൂടുതലും നടക്കുന്നത്. ഉപയോക്താക്കളും രണ്ട് ലക്ഷം രൂപയിൽ കൂടുതലുള്ള ഇടപാടുകൾ പണം ഉപയോഗിച്ച് നടത്താറില്ല. രണ്ട് ലക്ഷത്തിന് മുകളിലുള്ള ഇടപാടുകള്‍ക്ക് ഒരു ശതമാനം നികുതി ഉറവിടത്തിൽ തന്നെ നൽകേണ്ടതിനാലും ആദായനികുതി വകുപ്പിന്റെ നിരീക്ഷണമുണ്ടാകുമെന്നതിനാലുമാണിത്. 50,000 രൂപയിൽ കൂടുതലുള്ള ഇടപാടുകൾ പലതവണ നടത്തിയാലും അവരെ അന്വേഷണത്തിന്റെ പരിധിയിൽ ഉൾപ്പെടുത്താനാകും.
സെൻട്രൽ എക്സൈസ് വകുപ്പ് ചുമത്തിയിട്ടുള്ള കേസുകളിൽ നിന്ന് ഇതുവരെ സ്വർണ വ്യാപാരികൾ മുക്തരായിട്ടില്ല. പുതിയൊരു വകുപ്പ് സ്വർണ വ്യാപാര മേഖല നിരീക്ഷിക്കുന്നതോടെ വ്യാപാരികളുടെ ബുദ്ധിമുട്ട് വർധിക്കും. ഇഡിയുടെ നോട്ടീസുകൾ വരുന്ന മുറയ്ക്ക് ചാർട്ടേഡ് അക്കൗണ്ടന്റുമാരേയോ കോടതിയെയോ സമീപിക്കേണ്ടിവരും. ഇതോടെ സാമ്പത്തിക ബാധ്യതയും കൂടും. അനധികൃത വ്യാപാരം കൂടാനും ഇതു കാരണമാകും. ഇത് നികുതി വരുമാനത്തെ ബാധിക്കും.
ഉപയോക്താക്കൾക്കും ആശങ്ക- പുതിയ ഉത്തരവിൽ ഉപയോക്താക്കളും ആശങ്കയിലാണെന്ന് ജുവലറി ഉടമകൾ പറയുന്നു. അംഗീകൃത സ്വർണക്കടകളിൽ നിന്ന് സ്വർണം വാങ്ങിയാൽ ഇഡിയുടെ നോട്ടീസ് ലഭിക്കുമോ എന്ന പേടി ഉപയോക്താക്കള്‍ക്കുണ്ട്. മക്കളുടെ വിവാഹം പോലുള്ള ആവശ്യങ്ങൾക്കായി വർഷങ്ങളുടെ അധ്വാനത്തിൽ നിന്ന് സ്വരുക്കൂട്ടിയ പണം ഉപയോഗിച്ച് സ്വർണം വാങ്ങാൻ ഭയക്കുന്ന ഉപയോക്താക്കളുമുണ്ട്. വിവാഹം നടക്കുന്ന വീടുകളിൽ പോലും ഇഡിയുടെ പരിശോധന നടക്കുമോ ആശങ്കപ്പെടുന്നവരും ചെറുതല്ല.