ബിഹാറിൽ നിതീഷ് കുമാറിന്‍റെ നേതൃത്വത്തിലുള്ള മന്ത്രിസഭ സത്യപ്രതിജ്ഞ ചെയ്ത് അധികാരമേറ്റിട്ട് ദിവസങ്ങൾ മാത്രമേ ആയിട്ടുള്ളു. ഇതിന് പിന്നാലെ തന്നെ വിവാദങ്ങളും വന്നുതുടങ്ങിയിട്ടുണ്ട്. ദേശീയഗാനം പോലും അറിയാത്ത ആളാണോ പുതിയ വിദ്യാഭ്യാസ മന്ത്രി എന്നാണ് സോഷ്യൽ മീഡിയയിലെ ചോദ്യം.
ഒരു പൊതുപരിപാടിയിൽ ദേശീയഗാനം തെറ്റായി പാടുന്ന മന്ത്രിയുടെ വീഡിയോയാണ് ഇപ്പോൾ വൈറലാകുന്നത്. ദേശീയഗാനം പോലും തെറ്റില്ലാതെ മുഴുവനും ഓർത്തു ചൊല്ലാൻ അറിയാത്ത ആളാണ് ബിഹാറിലെ നിതീഷ് കുമാർ മന്ത്രിസഭയിലെ പുതിയ വിദ്യാഭ്യാസമന്ത്രി എന്ന് വീഡിയോ പങ്കുവെച്ചുകൊണ്ട് രാഷ്ട്രീയ ജനതാ ദൾ ട്വിറ്ററിൽ കുറിച്ചു.
ഡോ. മേവാലാൽ ചൗധരിയാണ് നിതീഷ് കുമാർ മന്ത്രിസഭയിലെ പുതിയ വിദ്യാഭ്യാസമന്ത്രി. മന്ത്രിയുടെ വീഡിയോ നിമിഷങ്ങൾക്കകം കൊണ്ട് സാമൂഹിക മാധ്യമങ്ങൾ വൈറലായി കഴിഞ്ഞു.