ഉപ്പള (www.mediavisionnews.in) പെരിങ്കടിയില്‍ കഞ്ചാവ് ലഹരിയില്‍ ഒരുസംഘം രാത്രിയില്‍ നടത്തുന്ന പരാക്രമങ്ങള്‍ നാട്ടുകാര്‍ക്ക് ദുരിതമാകുന്നു. വാഹനങ്ങളും കാല്‍നടയാത്രക്കാരെയും ഈ സംഘം തടഞ്ഞുനിര്‍ത്തി ഭീഷണിപ്പെടുത്തുകയാണെന്ന പരാതി ശക്തമാകുകയാണ്. പെരിങ്കടി എം.പി ജംഗ്ഷനില്‍ രാത്രി കാലങ്ങളില്‍ പുറത്ത് നിന്ന് വാഹനങ്ങളിലെത്തുന്ന ഒരു സംഘമാണ് കഞ്ചാവ് ലഹരിയില്‍ മറ്റ് വാഹനങ്ങള്‍ തടയുന്നത്. വാഹനങ്ങളിലുള്ളവരുമായി കയര്‍ക്കുകയും ഭീഷണി മുഴക്കുകയും ചെയ്യുന്നു. കാല്‍നടയാത്രക്കാരെ അസഭ്യം പറഞ്ഞ് ഉപദ്രവിക്കുന്നതും പതിവാണ്. മദ്യ കുപ്പികളും മറ്റും റോഡില്‍ എറിഞ്ഞുടക്കുകയും ചെയ്യുന്നു. ഇവരെ ചോദ്യം ചെയ്താല്‍ കൊല്ലുമെന്ന് ഭീഷണി മുഴക്കുന്നതായി നാട്ടുകാര്‍ ആരോപിച്ചു. സന്ധ്യമയങ്ങിയാല്‍ എത്തുന്ന സംഘം അര്‍ദ്ധരാത്രിവരെ പ്രദേശത്ത് വിളയാട്ടം നടത്തുകയാണ്. പലരും ഇവരെ ഭയന്ന് കഴിയേണ്ട ഗതികേടിലാണുള്ളത്. രാത്രികാലങ്ങളില്‍ പൊലീസ് പെരിങ്കടിയിലും സമീപത്തും പരിശോധന കര്‍ശനമാക്കണമെന്ന് നാട്ടുകാര്‍ ആവശ്യപ്പെട്ടു.