കോഴിക്കോട്: (www.mediavisionnews.in) കാറില്‍ കടത്തുകയായിരുന്ന അഞ്ചര കിലോ കഞ്ചാവുമായി നാല് കാസര്‍കോട് സ്വദേശികള്‍ കോഴിക്കോട് പിടിയിലായി. ഉളിയത്തടുക്ക ശിരിബാഗിലു സ്വദേശികളായ കലന്തര്‍ ഇബ്രാഹിം റാഷിഫ് (23), ഇബ്രാഹിം ബാദുഷ (22), പുളിക്കൂര്‍ അര്‍ഷാദ് (28), പുളിക്കൂര്‍ മുഹമ്മദ് അസ്ഹറുദ്ദീന്‍ (22) എന്നിവരാണ് മാറാട് പോലീസിൻ്റെ പിടിയിലായത്. പ്രിന്‍സിപ്പല്‍ എസ്‌ഐ എം സി ഹരീഷിൻ്റെ നേതൃത്വത്തില്‍ മാത്തോട്ടം കുത്തുകല്ല് റോഡ് ജംഗ്ഷനില്‍ വാഹന പരിശോധയ്ക്കിടെയാണ് സ്വിഫ്റ്റ് കാറില്‍ നിന്നു കഞ്ചാവ് കണ്ടെടുത്തത്.
കോഴിക്കോട് നഗരത്തിലും പരിസരപ്രദേശങ്ങളിലും കഞ്ചാവ് എത്തിക്കുന്ന സംഘത്തിലെ പ്രധാനികളാണ് അറസ്റ്റിലായതെന്ന് പോലീസ് പറഞ്ഞു. ആന്ദ്രയില്‍ നിന്നു മംഗളൂരുവഴിയാണ് കഞ്ചാവ് കൊണ്ടുവരുന്നത്. പ്രധാന റോഡുകള്‍ ഒഴിവാക്കി ഊടുവഴികളിലൂടെ അതിര്‍ത്തി കടത്തിയാണ് ഇവ എത്തിക്കുന്നത്. കാസര്‍കോട്ടെ രഹസ്യകേന്ദ്രത്തില്‍ സൂക്ഷിക്കുന്ന ഇത് ആവശ്യക്കാര്‍ വിളിക്കുന്നതിനനുസരിച്ച് എത്തിച്ചുനല്‍കും. യുവാക്കളെ കേന്ദ്രീകരിച്ചാണ് പ്രധാന വില്‍പ്പനയെന്ന് ചോദ്യം ചെയ്യലില്‍ പ്രതികള്‍ മൊഴി നല്‍കി.
കാസര്‍കോട് മുതല്‍ എറണാകുളം വരെയുള്ള കഞ്ചാവുകച്ചവടക്കാരുമായി ഇവര്‍ക്കു ബന്ധങ്ങളുണ്ടെന്നാണ് പോലീസ് പറയുന്നത്. ആര്‍ഭാടജീവിതത്തിനും ദീര്‍ഘദൂര വിനോദയാത്രയ്ക്കും മറ്റുമാണ് ലഹരിവില്‍പ്പനയിലൂടെ ലഭിക്കുന്ന പണം ഉപയോഗിക്കുന്നത്. പ്രതികളില്‍ നിന്നു ലഭിച്ച വിവരത്തിന്റെ അടിസ്ഥാനത്തില്‍ വിശദമായ അന്വേഷണം നടത്തുമെന്ന് ഇന്‍സ്‌പെക്ടര്‍ കെ വിനോദന്‍ അറിയിച്ചു. ഇവരില്‍ നിന്നു കഞ്ചാവ് വാങ്ങുന്നവരെക്കുറിച്ചടക്കം അന്വേഷിക്കും. എസ്‌ഐ എം സജീവ്, എഎസ്‌ഐ പി മുഹമ്മദ്, ശൈലേന്ദ്രന്‍, കെ ധനേഷ്‌കുമാര്‍, പി ജാംഗീഷ്, പി പ്രവീണ്‍, സി വിപിന്‍ എന്നിവര്‍ സംഘത്തിലുണ്ടായിരുന്നു. പ്രതികളെ കോടതിയില്‍ ഹാജരാക്കി.
നഗരത്തിലെയും പരിസരത്തെയും ലഹരി മാഫിയയുടെ പ്രവര്‍ത്തനം തടയാന്‍ സിറ്റി പോലീസ് ഡെപ്യൂട്ടി കമ്മീഷണര്‍ സുജിത്ത്ദാസ് നിര്‍ദേശം നല്‍കിയിട്ടുണ്ട്. ഇതിൻ്റെ അടിസ്ഥാനത്തിലാണ് സ്റ്റേഷനുകളില്‍ വാഹനപരിശോധനയുള്‍പ്പെടെയുള്ള നടപടികള്‍ കര്‍ശനമാക്കിയിട്ടുള്ളത്. രണ്ടുമാസത്തിനിടെ വന്‍തോതില്‍ കഞ്ചാവ് പിടികൂടിയ മൂന്നു സംഭവങ്ങളാണ് കോഴിക്കോട്ടുണ്ടായത്. കഴിഞ്ഞദിവസം മുക്കത്തിനടുത്ത് ഓമശേരിയില്‍ വെച്ച് പത്തുകിലോ കഞ്ചാവുമായി യുവാവും സഹോദരിയും പിടിയിലായിരുന്നു. ഈ മാസം ആദ്യ ആഴ്ചയില്‍ ലോറിയില്‍ കൊണ്ടുവന്ന പന്ത്രണ്ടുകിലോ കഞ്ചാവ് കുന്നമംഗലത്തുവച്ചും പിടികൂടിയിരുന്നു. കാറില്‍ കടത്തുകയായിരുന്ന അമ്പത്തിരണ്ട് കിലോ കഞ്ചാവ് കോഴിക്കോട് ബീച്ചില്‍ വച്ച് പിടികൂടിയത് ഒരു മാസം മുൻപാണ്.