കുമ്പള: (www.mediavisionnews.in) കാറിൽ കടത്തുകയായിരുന്ന മദ്യം പോലീസ് പിന്തുടർന്ന് പിടിച്ചു. മംഗളൂരുവിൽനിന്ന്‌ കൊണ്ടുവരികയായിരുന്ന 250 ലിറ്റർ കർണാടക, ഗോവ നിർമിത മദ്യമാണ് പിടികൂടിയത്. ഇതുമായി ബന്ധപ്പെട്ട് ചിഗുർപ്പദവിലെ ചന്ദ്രശേഖരയെ (33) അറസ്റ്റ് ചെയ്തു.
കാറിനകത്തുണ്ടായിരുന്ന മറ്റൊരാൾ ഓടിരക്ഷപ്പെട്ടു. കാസർകോട് ഡിവൈ.എസ്.പി. പി. ബാലകൃഷ്ണൻ നായരുടെ നിർദേശപ്രകാരം കുമ്പള പോലീസാണ് മദ്യം പിടിച്ചത്. അതിർത്തിയിൽനിന്നുതന്നെ പോലീസ് കാറിനെ പിന്തുടർന്നു. പോലീസ് പിന്തുടരുന്നുവെന്ന് മനസ്സിലാക്കിയ സംഘം കാർ ഊടുവഴികളിലൂടെ ഓടിച്ചുവെങ്കിലും സീതാംഗോളി എച്ച്.എ.എല്ലിനുത്ത് വെച്ച് വാഹനം കുറുകെയിട്ട് തടയുകയായിരുന്നു. ഓടിരക്ഷപ്പെട്ട ആളെ കണ്ടെത്താനുള്ള ശ്രമം തുടരുന്നതായി പോലീസ് അറിയിച്ചു. മദ്യം കടത്താനുപയോഗിച്ച കാർ പോലീസ് കസ്റ്റഡിയിലെടുത്തു. കുമ്പള എസ്.ഐ.മാരായ എ. സന്തോഷ് കുമാർ, രാജീവൻ, സോമയ്യ, എ.എസ്.ഐ. ലക്ഷ്മി നാരായണ, സിവിൽപോലീസ് ഓഫീസർമാരായ രാജേഷ് മാണിയാട്ട്, എം.വൈ. തോമസ്, ദിനേശൻ, രൂപേഷ്, ഓസ്റ്റിൻ തമ്പി, സലിൻരാജ്, ലനീഷ്, ഹിതേഷ്, ഉമേഷ് ചന്തേര എന്നിവർ പരിശോധനയിൽ പങ്കെടുത്തു.