ഉത്തർപ്രദേശിൽ ഒരു പുരുഷൻ 60 വയസുള്ള സ്ത്രീയെ വെടിവെച്ച് കൊലപ്പെടുത്തുന്നതിന്റെ ഭയാനകമായ വീഡിയോ പുറത്ത്. ഒരു മിനിറ്റ് ദൈർഘ്യമുള്ള വീഡിയോ ചിത്രീകരിച്ചത് അയൽവാസികളിലൊരാളാണ്.
അടുത്തടുത്ത് കെട്ടിടങ്ങൾ ഉള്ള കസ്ഗഞ്ചിലെ ഗ്രാമത്തിൽ ഒരു കെട്ടിടത്തിന്റെ ടെറസിൽ നിന്ന് എടുത്ത മൊബൈൽ വീഡിയോയിൽ, തെരുവിൽ വികലാംഗനായ പുരുഷൻ നിലത്ത് ഇരുന്ന് കൊണ്ട് കയ്യിലുള്ള നാടൻ പിസ്റ്റൾ വൃദ്ധയായ സ്ത്രീക്ക് നേരെ ചൂണ്ടി ഭീഷണിപ്പെടുത്തുകയും, സ്ത്രീ എഴുന്നേറ്റ് വീട്ടിലേക്ക് ഓടാൻ ശ്രമിക്കവേ വെടിയുതിർക്കുകയും തുടർന്ന് നിലത്ത് വീണു കിടക്കുന്ന സ്ത്രീക്ക് നേരെ വീണ്ടും വെടിവെയ്ക്കുന്നതും കാണാം.
എന്തിനാണ് കൊലപാതകം നടത്തിയത് എന്ന ചോദ്യത്തിന് തന്റെ സ്വത്ത് സ്ത്രീ ഒരു മുസ്ലിമിന് വിറ്റതിനാണ് കൊലപ്പെടുത്തിയത് എന്നാണ് പ്രതി പറഞ്ഞത്.
“ഇത് സ്വത്തുമായി ബന്ധപ്പെട്ടതാണ് … അവൾ ഒരു മുസ്ലിമിന് സ്വത്ത് വിൽക്കുകയായിരുന്നു.” പ്രതി മോനു പറഞ്ഞു.
പ്രതിയായ മോനു അറസ്റ്റിലായി. കൊലപാതകത്തിന് ശേഷം ഇയാൾക്ക് അഭയം നൽകിയ മറ്റൊരാളെയും അറസ്റ്റ് ചെയ്തതായി പൊലീസ് പറഞ്ഞു. കൊലപാതകം ചിത്രീകരിച്ച യുവതിയുടെ അയൽവാസികൾക്ക് നിയമനടപടി നേരിടേണ്ടിവരുമെന്ന് പൊലീസ് പറഞ്ഞു.