ദുബൈ: (www.mediavisionnews.in) കോവിഡ് പ്രതിരോധ പ്രവര്‍ത്തനങ്ങളുടെ ഭാഗമായി വിസ നിയന്ത്രണം കര്‍ശനമാക്കിയ യു.എ.ഇയില്‍ ഇന്ത്യയില്‍ നിന്നെത്തിയ യാത്രക്കാരെ വിമാനത്താവളത്തില്‍ നിന്ന് തിരിച്ചയക്കുന്നു. ഇന്നലെ രാത്രി കൊച്ചി വിമാനത്താവളത്തില്‍ നിന്ന് ഇത്തിഹാദ് വിമാനത്തില്‍ അബൂദബയില്‍ വന്നിറങ്ങിയ നിരവധി പേര്‍ക്കാണ് തിരിച്ചുപോരേണ്ടി വന്നിരിക്കുന്നത്. നേരത്തേ അനുവദിച്ച സന്ദര്‍ശക വിസകളും അസാധുവാകുന്ന വിവരം മാധ്യമം റിപ്പോര്‍ട്ട് ചെയ്തിരുന്നു.
പുതിയ വിസകള്‍ ഇഷ്യൂ ചെയ്യുന്നത് മാര്‍ച്ച്‌ 17 മുതല്‍ യു.എ.ഇ നിര്‍ത്തിവെച്ചിരിക്കുകയാണ്. അതിന് മുന്‍പ് ഇഷ്യൂ ചെയ്ത സന്ദര്‍ശക, ടൂറിസ്റ്റ് വിസകളുമായും ഇപ്പോള്‍ യു.എ.ഇയിലേക്ക് യാത്ര അസാധ്യമാണ്. കാലാവധിയുള്ള താമസ വിസയുള്ളവര്‍ക്ക് മാത്രമേ നിലവില്‍ രാജ്യത്തേക്ക് പ്രവേശനം ലഭിക്കുകയുള്ളൂ.
യാത്രാ നിയന്ത്രണങ്ങള്‍ ശക്തമാക്കിയ അവസ്ഥയില്‍ അത്യാവശ്യമല്ലാത്ത യാത്രകള്‍ പൂര്‍ണമായും ഒഴിവാക്കണമെന്ന് യു.എ.ഇ അധികൃതരും ഇന്ത്യന്‍ എംബസിയും യാത്രക്കാര്‍ക്ക് പ്രത്യേകം നിര്‍ദേശം നല്‍കിയിരുന്നു. വരും ദിവസങ്ങളില്‍ കൂടുതല്‍ യാത്രാ വിലക്കുകള്‍ ഉണ്ടാവും എന്നും സൂചനയുണ്ട്.