പൈവളിഗെ: (www.mediavisionnews.in) കൂലിത്തൊഴിലാളിയെ കാറില്‍ തട്ടിക്കൊണ്ടുപോയി മര്‍ദ്ദിച്ചതായി പരാതി. പൈവളിഗെ സീറത്തടുക്ക ബദിമൂലയിലെ അബ്ദുല്‍ഖാദറി(45)നാണ് മര്‍ദ്ദനമേറ്റത്. കുമ്പള ജില്ലാ സഹകരണ ആസ്പത്രിയില്‍ പ്രവേശിപ്പിച്ചു.
ഇന്നലെ രാത്രി ഏഴ് മണിയോടെ പള്ളിയിലേക്ക് നടന്നുപോകുന്നതിനിടെ കാറിലെത്തിയ മൂന്നുപേര്‍ തടഞ്ഞുനിര്‍ത്തുകയും ബലമായി പിടിച്ചുകയറ്റി കൊമങ്കള എന്ന സ്ഥലത്ത് കൊണ്ടുപോയി മര്‍ദ്ദിക്കുകയായിരുന്നുവത്രെ. ബഹളം വെച്ചപ്പോള്‍ സംഘത്തിലെ ഒരാളുടെ വീടിന് സമീപത്തെ കുന്ന് പ്രദേശത്ത് കൊണ്ടുവന്ന് മര്‍ദ്ദിക്കുകയും കഞ്ചാവ് വലിപ്പിക്കാനും മദ്യം കുടിപ്പിക്കാനും ശ്രമിച്ചതായും അബ്ദുല്‍ഖാദര്‍ പറയുന്നു.
രാത്രിയോടെ ഖാദറിനെ ഉപേക്ഷിച്ച് സംഘം കടന്നുകളയുകയായിരുന്നുവത്രെ. സ്ഥലം സംബന്ധിച്ച തര്‍ക്കമാണ് മര്‍ദ്ദനത്തിന് പിന്നിലെന്ന് സംശയിക്കുന്നതായി പൊലീസ് പറഞ്ഞു. മഞ്ചേശ്വരം പൊലീസ് കേസെടുത്ത് അന്വേഷണം നടത്തിവരുന്നു.