മഞ്ചേശ്വരം: (www.mediavisionnews.in) പശുമോഷണത്തിന് എത്തിയ സംഘത്തിലെ രണ്ടുപേരെ നാട്ടുകാര്‍ വളഞ്ഞുവെച്ച് പൊലീസില്‍ ഏല്‍പ്പിച്ചു. രണ്ടുപേര്‍ ഓടി രക്ഷപ്പെട്ടു. ഇവരെത്തിയ സ്വിഫ്റ്റ് കാര്‍ പൊലീസ് കസ്റ്റഡിയിലെടുത്തു. തിങ്കളാഴ്ച്ച പുലര്‍ച്ചെ മൂന്നര മണിയോടെ ഉപ്പള മുസോടിയിലാണ് സംഭവം. മഞ്ചേശ്വരം പൊലീസ് കര്‍ണാടക സ്വദേശികളായ രണ്ടുപേരെ ചോദ്യം ചെയ്തുവരികയാണ്.
കഴിഞ്ഞ ആറുമാസത്തിനിടെ മുസോടി, മണിമുണ്ട എന്നിവിടങ്ങളില്‍ നിന്നായി 30 ഓളം പശുക്കളെ കാണാതായിരുന്നു. ഇതേ തുടര്‍ന്ന് മോഷണ സംഘത്തെ പിടികൂടാന്‍ നാട്ടുകാര്‍ നിരീക്ഷണം ഏര്‍പ്പെടുത്തിയിരുന്നു. ഇന്ന് പുലര്‍ച്ചെ സംശയ സാഹചര്യത്തില്‍ കണ്ട കാറും സംഘത്തേയും നാട്ടുകാര്‍ വളഞ്ഞുവെക്കുകയായിരുന്നു. കാറിനകത്ത് കത്തി, കയര്‍, പ്ലാസ്റ്റിക് ഷീറ്റ് തുടങ്ങിയവ കണ്ടെത്തി. സംഘത്തെ നാട്ടുകാര്‍ വളഞ്ഞുവെക്കുന്നതിനിടെ രണ്ടുപേര്‍ ഓടി രക്ഷപ്പെടുകയായിരുന്നു.