കണ്ണൂര്‍: (www.mediavisionnews.in) മദ്രസാ കെട്ടിട ധനസമാഹരണ വേദിയില്‍ സ്വര്‍ണ മോതിരം ഊരി നല്‍കിയ വനിതാ എസ്.ഐയെ അഭിനന്ദിച്ച് സയ്യിദ് സാദിഖലി ശിഹാബ് തങ്ങളുടെ ഫേസ്ബുക്ക് പോസ്റ്റ് സമൂഹമാധ്യമങ്ങളില്‍ വൈറലായി
ചെറുവാഞ്ചേരിയില്‍ തിങ്കളാഴ്ച ചിരാറ്റ കുഞ്ഞിപ്പള്ളി മിസ്ബാഹുല്‍ ഹുദാ മദ്രസാ കമ്മിറ്റിയുടെ നേതൃത്വത്തില്‍ നടന്ന മദ്രസാ ശിലാസ്ഥാപന ചടങ്ങിനു ശേഷമുള്ള ഫണ്ട് ശേഖരണ വേദിയിലായിരുന്നു ഡ്യൂട്ടിയിലുണ്ടായിരുന്ന കണ്ണവം വനിതാ എസ്.ഐ. നസീമ കൈവിരലിലെ മോതിരം ഊരി സാദിഖലി ശിഹാബ് തങ്ങള്‍ക്ക് കൈമാറിയത്. ഇത് നാട്ടുകാരേയും സംഘാടകരേയും അതിശയിപ്പിച്ചു.
ഇവരെ പോലുള്ള സ്‌നേഹ ജീവികള്‍ കേരളത്തില്‍ ഉള്ളതുകൊണ്ടാണ് ഇവിടെ ദൈവത്തിന്റെ സ്വന്തം നാടാവുന്നതെന്നാണ് സാദിഖലി തങ്ങള്‍ ഫോട്ടോ സഹിതം ഫേസ്ബുക്കില്‍ കുറിച്ചത്. മദ്രസാ ഫണ്ട് ശേഖരണത്തിന്റെ ഭാഗമായി പലരും സംഭാവനകള്‍ നല്‍കിയിരുന്നുവെങ്കിലും ഡ്യൂട്ടിയ്ക്കത്തിയ വനിതാ പൊലിസ് സ്വര്‍ണ മോതിരം ഊരി നല്‍കിയ സംഭവം സംഘാടകരില്‍ ഏറെ ആവേശമുളവാക്കിയെന്ന് മദ്രസാ കമ്മിറ്റി സെക്രട്ടറി കെ.കെ.സമീറും പറഞ്ഞു.
മീഡിയവിഷൻ ന്യൂസിൽ വാർത്തകൾക്കും പരസ്യങ്ങൾക്കും 9895046567 എന്ന നമ്പറിൽ ബന്ധപ്പെടുക