ഉപ്പള: (www.mediavisionnews.in) ഡ്രൈവറുടെ കുത്തേറ്റ് ബാങ്ക് സെക്രട്ടറിക്ക് പരിക്ക്. ഉപ്പള കാർഷിക വികസനബാങ്ക് സെക്രട്ടറി മൈലാട്ടി സ്വദേശി ടി.വിജയനാണ് (56) പരിക്കേറ്റത്. തിങ്കളാഴ്ച വൈകിട്ട് 4.15-ന് ബാങ്കിനുള്ളിലാണ് സംഭവം.
കാബിനിലിരിക്കുകയായിരുന്ന വിജയനെ ബാങ്കിന്റെ ഡ്രൈവറും ഷേണി സ്വദേശിയുമായ രമേശൻ വാളുപയോഗിച്ച് കുത്തുകയായിരുന്നു. സ്ഥലത്തെത്തിയ പോലീസ് വിജയനെ കാസർകോട് ജനറൽ ആസ്പത്രിയിലെത്തിച്ചു. ഇടതുതോളിന്റെ പിൻഭാഗത്തായിട്ടാണ് പരിക്ക്. പരിക്ക് ഗുരുതരമല്ല.
രമേശന്റെ കൈയിൽ കത്തിയുമുണ്ടായിരുന്നുവെന്ന് വിജയൻ പറയുന്നു. രണ്ടാമത് കുത്താൻ ശ്രമിച്ചപ്പോൾ വാളിൽ കയറിപ്പിടിച്ച വിജയന്റെ കൈപ്പത്തി മുറിയുകയും ചെയ്തു.
ഏതാനുംപേർ രാജിവെച്ചതിനെത്തുടർന്ന് കോൺഗ്രസിന്റെ നേതൃത്വത്തിലുള്ള ബാങ്ക് ഭരണസമിതിയെ സർക്കാർ പിരിച്ചുവിട്ടിരുന്നു. ഇതുമായി ബന്ധപ്പെട്ട് ഇതിനുമുമ്പേ തനിക്ക് വധഭീഷണിയുണ്ടായിരുന്നുവെന്നും വിജയൻ പറഞ്ഞു.
ഇതുസംബന്ധിച്ച് പോലീസിൽ പരാതി നൽകിയിരുന്നു. പിരിച്ചുവിട്ട ഭരണസമിതിയെ വീണ്ടും അധികാരത്തിലേറാൻ സഹായിക്കുംവിധം സർക്കാരിന് റിപ്പോർട്ട് നൽകണമെന്നാവശ്യപ്പെട്ട് ചിലർ നിരന്തരം ഭീഷണിപ്പെടുത്തിയിരുന്നുവെന്നും ഇതിന് വഴങ്ങാതിരുന്നതിനാലാണ് കുത്തിയതെന്നും വിജയൻ പറയുന്നു.
വിജയന്റെ മൊഴിയെടുത്തശേഷം മറ്റു നടപടികളിലേക്ക് കടക്കുമെന്ന് മഞ്ചേശ്വരം പോലീസ് അറിയിച്ചു.
മീഡിയവിഷൻ ന്യൂസ് വാട്സാപ്പില്‍ ലഭിക്കാന്‍ 9895046567 എന്ന നമ്പര്‍ സേവ് ചെയ്തതിനുശേഷം നിങ്ങളുടെ പേര് ഈ നമ്പറിലേക്ക് വാട്സാപ്പ് മെസേജ് അയക്കൂ.